Liliana ta bek den festival di buki pa mucha

Biblioteca Nacional Aruba ta trece otro edicion di Festival di buki pa mucha. Esaki pa promove lesamento cerca tur mucha di scol. Pronto un grupo di autor y ilustrador ta bishita hopi mucha di scol y pa e muchanan cu no ta haya bishita na scol tin actividad atardi na biblioteca mes. Tur esaki den siman di dia 2 pa dia 6 di december.

Liliana Braamskamp-Erasmus ta un autor conoci cu den e ultimo 10 aña a participa varios biaha na e festival. Liliana a nace cu un pasion pa skirbi y tin hopi buki riba su nomber. E aña aki e tema di e festival ta ‘Naturalesa,ciencia, y tecnologia’. Den un entrevista Liliana ta conta algo mas di su participacion.

Kico bo ta gusta di e tema di e aña aki y con bo ta trece esaki den bo presentacion?

“Semper mi tin un mensahe den mi bukinan, sea scondi of cla y raspa. Locual mi ta gusta di e tema e aña aki ta cu e ta un tema masha diverso. Bo por haya sa asiiiiiina hopi cos door di lesa buki. Tin biaha sin cu bo mes ta spera! Door cu mi ta stima naturalesa, mi ta kere mi lo enfoca hopi riba e topico aki. Pero, Ra Ra Ra... Ken sa cuanto otro topico mi lo encontra? Pesey mi ta bishita e scolnan di Aruba, ta pa mi haya sa!”

Tin un pregunta of comentario di un mucha cu semper lo bo keda corda?

Tin hopi cara contento, brasa, sunchi, comentario, carta, regalo cu mi a ricibi durante tur mi añanan (mas cu 10?) di Festival di Buki pa mucha, cu mi lo semper keda korda. Muchanan cu ta haya gana di bay skirbi buki of bira ilustrador, pero mas importante: muchanan cu ta descubri con dushi lesamento por ta (despues cu nan a hisa dede cu nan no ta lesa!) J Locual semper ta sorprende mi ta cuanto nan sa di mi -- di A te Z! Y mi no ta mind comparti mi alma y curason cu nan. Cu mil amor.

Tempo cu abo tabata chikito, ken tabata bo autor faborito?

Tempo mi tabata chikito, mi tabata tin hopi autor faborito, ilustrador tambe. Te ainda mi ta encanta storia di fantasia, sprookjes, poesia, suspenso. Buki di Roald Dahl, Annie M.G. Schmidt, Lydia Rood, The Tjong Khing... Mucho hopi pa menciona. Ainda mi ta gusta lesa buki di mucha, pesey J ”

Liliana Braamskamp-Erasmus ta biba na Aruba cu su casa Albert, yiu homber Enric, yiu muher Alyza, hopi yuwana, lagadishi, trupial, prikichi y den bes en cuando un colebra, un cabrito, un burico ta pasa bishita. Su ultimo publicacionnan ta ‘No Ta Mishi!’ (Kiwanis Club Of Aruba/ Fundacion Respeta Mi, 2015) y ‘Rog Aan De Haak’ (Zwijsen, 2015). Pa sa mas di Liliana por bishita www.lilianaerasmus.com

Tur mucha ta bon bini na e fiesta di apertura diabierna atardi 6or, dia 30 di november patras di biblioteca.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn