Livio Hermans ta duna recital na biblioteca diadomingo atardi

Livio Hermans ta duna un recital riba piano diadomingo 19 di april di 5 or di atardi pa 6 or y mey na Biblioteca Nacional Aruba den George Madurostraat. Livio Hermans ta toca riba e vleugel di biblioteca. Pa e prome parti di programa Livio ta toca musica clasico di siglo 17 y 18 (Scarlatti, Bach, Haydn y Mozart) y despues di pauze Livio ta toca 3 Wals di compositor Arubiano di diferente generacion, Juan Padu Chabaya Lampe, Oswald Wever y Johnny Croes.

Dr. Livio Hermans, un gran amigo di biblioteca, ta medico y apotheker, cu un talento y pasion grandi pa piano. Cu 7 aña Livio a haya su prome les di piano cerca Miss Lilian van Dijck. Despues el a sigui cu les cerca maestro Edgar Palm, teoria di musica y en particular ehecucion di musica antiyano. Durante su estudio na Amsterdam el a tuma les di interpretacion di musica clasico di siglo 18 y 19.

Durante añanan Livio a duna diferente presentacion riba piano, tanto como solista como acompañante na piano di p.e. ‘Orfeon Crescendo’ di Frank Davelaar na Corsou. Sinembargo su preferencia semper a bay pa acompaña na piano “das Lied”. Na 1995 Livio a saca un CD di composicionnan di Edgar Palm q.e.p.d. como homenahe na e gran maestro aki.

Como un lesador y studiante pa bida, Livio ta un fiel bishitante di biblioteca. Amantenan di musica clasico ta bon bini pa bishita biblioteca diadomingo pa gosa di un bunita recital di Livio Hermans.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn