Livio Hermans ta duna recital na biblioteca

Livio Hermans ta duna un recital riba piano diadomingo 17 di februari di 6 or di atardi  pa 8 or di anochi na Biblioteca Nacional Aruba den George Madurostraat. Livio Hermans ta toca riba e vleugel di biblioteca. Pa e prome parti di programa es ta toca musica clasico di siglo 18 y 19 y despues di pauze e ta dedica na  musica Antiano y di Aruba.

Dr. Livio Hermans, un gran amigo di biblioteca, ta medico y apotheker, cu un talento y pasion grandi pa piano. Cu 7 aña Livio a haya su prome les di piano cerca Miss Lilian van Dijck. Despues el a sigui cu les cerca maestro Edgar Palm, teoria di musica y en particular ehecucion di musica antiyano. Durante su estudio na Amsterdam el a tuma les di interpretacion di musica clasico di siglo 18 y 19.

Durante añanan Livio a duna diferente presentacion riba piano, tanto como solista como acompañante na piano di p.e. ‘Orfeon Crescendo’ di Frank Davelaar na Corsou. Sinembargo su preferencia semper a bay pa acompaña na piano “das Lied”. Na 1995 Livio a saca un CD di composicionnan di Edgar Palm q.e.p.d. como homenahe na e gran maestro aki.

Como un lesador y studiante pa bida, Livio ta un fiel bishitante di biblioteca. Amantenan di musica clasico ta bon bini pa bishita biblioteca diadomingo pa gosa di un bunita  recital di Livio Hermans.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn