Maria Mathilda-Kock

Maria Mathilda-Kock

Maria Mathilda-Kock, suedonimo Tasair, naci 10 november 1928 Alto Vista Aruba, masha hoben a perde su mayornan. Su formacion y educacion el a ricibi na Huize Sint jozef, Curacao y a completa su estudio di MULO y despues a sigui estudio pa juffrouw di scol na Sint Martinus Gesticht. Na aña 1948 el a obtene diploma pa juffrouw di scol y a drenta enseñansa na su isla natal Aruba te cu aña 1998, na diferente scol.

Juffrouw Maria, manera colega y muchanan ta yame, no ta skirbi poesia so, pero ta pinta cuadra, y ta caligrafia diploma y certificado. Un tempo e tabata comediante di Mascaruba y tambe a yuda traduci varios comedia na Papiamento.

“Sombra di mi mente” ta su prome publicacion y tin e firma speransa cu lo sigui mas pa asina duna Papiamento mas balor literal.

(Nunca tabata intencion di Maria Mathilda-Kock pa publica su pioesian na bida pero despues di su morto y ta pa tal motibo a skirbi bao seudonimo Tasair, cu ta un abreviacion di nombernan di su tres yiunan, Tamahine, Samantha, Igor, kendenan a keda cu e encargo pa publica su poesianan despues di tempo, pero Samantha cu yudansa di su prima Inger Lopez, a tribi recohe tur poesia di su mama y asina “Sombra di mi mente” a nace pa enrikese literatura Papiamento.)

Amor

Mescos cu humedad
den tera seco
ta penetra
asina tambe
den mi bida
bo a drenta
Mescos cu biento
E palma
na oriya
di lama
E ta caricia
Asina tambe bo abraso
ta carga mi
riba olanan
infinito
Riba coriente
di pasionnan
sin control
Mescos cu e bina
su sed
n’e fuente
e ta sacia
Asina ami
ta desea
dulsura
di bo manantial

Tasair, september 2000


 

Publica: februari 2010

Oranjestad - Maria Mathilda-Kock a entrega su di dos obra di poesia titula “E Hadrei di Inspiracion” na Sra. Lilian Semeleer directora interino di Biblioteca Nacional Aruba. E buki aki ta e ehemplar cu ta pa warda den e Coleccion Nacional di Departamento di Arubiana. “ E Hadrei di Inspiracion” ta contene 10 poesia cu ta refleha varios situacion di bida.

Maria su inspiracion ta bini ora cu e ta sinta den su hadrei y ta reflexiona riba cosnan cu ta pasa rond di dje. Den e coleccion aki tin tambe e poesia “Mi Pasado” cu a gana na Hulanda e premio “Simia Literario” na 2004. Maria Mathilda-Kock, naci na Aruba, tabata docente na scol basico pa mas di 40 aña y e ta skirbi bou e seudonimo “Tasaïr”. Su prome coleccion di poesia tin como titulo “Sombra di mi mente” publica na 2003. E buki nobo ta obtenibel pa Afl. 20,00 na cas di e poeta situa na Hooiberg 51-E. Yama di antemano na 585-8232 y bin busca bo ehemplar despues di 5 or di atardi.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn