Mariebelle Arends

Mi ta traha na Arco Iris Kleuterschool, desde aña 1999. Desde semper mi sa cu ta un maestra mi kier a bira. Na 1983 ma caba scol na Aruba y e mes aña ey APA a sera su portanan. Asina ma coy rumbo pa Merca y ma bay studia Business Management. Hulanda mi no kier a bay. Na 1996 ma haya e chens pa bolbe bay studia ora cu ma tende oferta di IPA y e biaha aki si tawata pa haci mi soño bira realidad.

Ma disfruta traha hunto cu mi colega Rini Almary Boekhoudt,  riba e buki  “Niki ta bay scol”.  Un di mi hobynan ta saca potret. Ta asina nos a tuma e decicion di traha un buki cu potret.

Un otro hobby dimi ta cushina y traha bolo. Mi ta traha tur sorto di bolo buscando riba YouTube. Ora mi caba di traha cada bolo ami mes ta purba un pida chikito so. Despues mi bisiñanan cu ta mi rumanan y nan casa ta bin cabe pami.

Biaha tambe ta algo cu mi ta disfruta haci. Mi no ta gusta bula, pero mi ta gusta conoce paisnan nobo. Mi di dos nomber ta Serafina den jet. Ya cu nunca ma casa ni haya yiu, mi ta obliga di biaha.

Un otro hobby cu mi tin ta inventa storia pa mucha.  Pesey mes mi tin e trabou perfecto.  Mi por inventa storia pa cada ocacion cu un super audiencia. Mi kleutersnan!

Mi hobby principal y pasion ta ser maestra. Mi gusta ta cu mucha. Mi no ta un persona di mainta, pero manera mi yega scol y mi wak e sonrisa riba cara di e muchanan mi dia ta drecha.  Mi gusta e edad di 4 pa 8 aña. Tur dia uno ta keda asombra cu e muchanan aki. Nan tin hopi fantasia y creatividad. Nan ta manera spons, hopi curioso pa siña y sa tur cos. Esaki ta e edad cu nan ta cariñoso. Esaki ta e motibo cu mi ta disfruta mi trabou. Un dia cu mi a haya un chens, lo mi skirbi un buki di tur e susesonan di mi añanan den kleuter.

Mi ta unico yiu muhe den un famia di 6.  Mi a disfruta masha hopi cu mi ruman hombernan. Nan a y ta malcriami un tiki te ainda. Esey ta e mihor parti di ta unico ruman muhe.  





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn