Mas autor di Corsou y Boneiro

Biblioteca Nacional Aruba ta preparando tur cos pa su Festival di Buki pa Mucha. A invita autornan di buki pa mucha di Boneiro, Corsou, Surnam, Hulanda y te hasta di Stockholm. Y tambe contadornan di storia manera Diana Marchena. Y sigur escritornan local, fiel contribudornan na e festival anual cu tin como meta promocion di lesamento bou mucha.

Tio Ali di Corsou ta sumamente contento di por participa un biaha mas den e Festival di buki pa mucha. Otro autor di Corsou cu ta bini Aruba ta sra. Laura Quast. For di Boneiro biblioteca ta spera sra. Jackie Bernabela y sra. Denise de Jongh-Rekwest.

Denise ta gusta siña mucha bon manera (etiquette) y ta conoci pa su bukinan di Kaylee. Jackie Bernabela a nace na Aruba y ta biba na Boneiro. Pa promove lesamento cerca muchanan Jackie gusta conta cuenta. Jackie a traha como maestra di scol como profesora di Drama na scolnan na Hulanda pero tambe na Boneiro y Corsou. El a yega di actua den obranan di teatro, film y opera den exterior.

Laura Quast ta director y docente di teatro. Laura su pasion ta pa siña hoben con ta skirbi y conta cuenta, con ta declama un poema y con nan mester practica pa hunga un rol den un cuenta. Laura ta skirbi cuenta y poesia,

Biblioteca Nacional Aruba ta organisa e festival aki pa promocion di lesamento y pa envolvi mucha activamente den e mundo di buki cu un siman di actividad rond di buki.

Un festival di buki cu participacion di mas cu 50 scol preparatorio, basico y special riba nos isla cu lo ricibi bishita di autor, ilustrador y contador di storia.

E actividadnan ta tuma lugar diferente caminda, tanto na biblioteca como na diferente scol. Tur aña ta scohe un tema central pa e festival y ta presenta un buki como e Regalo di Siman di Buki. Durante e proximo simannan lo informa di tur autor y ilustrador y tur noticia rondo di e Festival di Buki pa Mucha 2015. ‘Ra…ra…ra con por ta? Lesa pa bo sa!’ ta e lema di e festival y e tema ta naturalesa, ciencia y tecnologia.

E apertura di Festival di Buki pa Mucha e aña aki ta tuma lugar diabierna dia 30 di october patras di biblioteca na Playa, di 5or pa 8or pm





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn