Memoria Nacional

Biblioteca Nacional Aruba ta e caha di tesoro cultural di documentonan original, escritonan y produccionnan cu ta forma parti di nos memoria colectivo.

Biblioteca ta conserva nos historia social, cultural, politico y economico. E conhunto di e material documental aki ta forma parti di e patrimonio cultural di Aruba cu mester ta conserva y actualisa como memoria nacional. Un pueblo mester por reconstrui y conoce e momentonan culminante di su historia y cultura pa por traha na su futuro.

Historia no ta un buki di receta, sino un obra di consulta di un projecto continuo di nation building y desaroyo. Tarea nucleo di Biblioteca Nacional Aruba ta pa facilita e acceso na nos historia, pa crea e condicionnan adecuado pa por prepara nos pa e retonan di nos futuro.

E deseo pa conoce nos pasado tabata forma parti di nos proceso di nation building, prome como isla y despues como pais.

E origen di nos biblioteca nacional ta data di 1949, ora cu dr. Johan Hartog, como prome bibliotecario di e Openbare Leeszaal en Boekerij, a cuminsa un coleccion di obranan arubiano y antiyano di buki, documento antiguo, rapport, folder, postkaart y informe anual. Cada buki tabata haya un stempel cu e peticion pa su sucesornan conservele pa siglonan venidero.

Durante decadanan e coleccion aki a sigui crece y a forma un base solido, pa na 1986, nos por a inaugura nos Biblioteca Nacional Aruba.  Aruba tabata memey di e proceso fascinante di nation building y di bira un estado, cu a haya su culminacion den Status Aparte. Na e momento cu ‘nacional’ ta haya otro nificacion, e patrimonio documental tambe ta haya otro contenido. Pesey, Aruba a haya su mesun bandera, himno, parlamento, gobierno, y tambe su Biblioteca Nacional Aruba.

Den e caso di nos pais, e directora di Biblioteca Nacional Aruba den e tempo ei,  sra. Alice van Romondt, a opta pa un structura parecido na esun di paisnan di Caribe, esta un biblioteca nacional cu funcion di biblioteca publico.

Pa cumpli cu su tarea pa conserva nos patrimonio documental, a crea e Departamento Arubiana cu ta colecciona tur buki y documento cu un arubiano a crea, na unda cu e por ta, den ki forma cu ta, esta manuscripto, pamfleta, buki, corant, video, portret; enfin, tur portador di creacion intelectual. Nos ta colecciona tur publicacion tocante Aruba, tambe esun publica den exterior. Hunto esaki ta forma e coleccion nacional.

Alohamiento y conservacion di un coleccion nacional ta exigi un trabao sistematico pa por ubica tur publicacion cu tin di haber cu Aruba of cu ta skirbi pa un arubiano. Mester percura pa tur publicacion nobo ta mas lihe posibel den e coleccion.

Pa sigura optimalisacion di e coleccion nacional ta necesario un ley di Deposito Legal, cu ta sigura cu Biblioteca Nacional ta haya ehemplarnan di tur publicacion y produccionnan multimedia nobo na Aruba.

Te awor aki por papia di un deposito voluntario. Hopi autor ta deposita nan obra voluntariamente, pero esaki no ta un siguransa pa haya tur publicacion. Un proposicion di Ley di Deposito Legal a wordo entrega algun aña pasa na Directie Wetgeving.

Den e cuadro di conservacion y acceso di nos documentonan biew, raro y balioso, Biblioteca Nacional Aruba a cuminsa un proyecto cu ayudo di Koninklijke Bibliotheek na Hulanda, subsidia pa UNESCO. Dos corant importante, Arubaanse Courant y El Despertador, a wordo poni riba microfilm y digitalisa riba CD, pa haci e consulta di e corantnan mas facil.

Diariamente, e importancia di nos coleccion nacional ta wordo enfatisa como herencia cultural y como fuente di informacion tocante nos isla.

Investigadornan cientifico, studiantenan di tur nivel di nos sistema educativo, empleado di gobierno, escritor y artistanan cu ta busca inspiracion den nos patrimonio cultural ta frecuenta nos departamento. Tin biaha hasta nan ta superpobla nos espacionan chikito. Cada vez mas, departamento di Arubiana ta haya un demanda creciente di nos usuario pa publicacion riba diferente tereno, cu no por wordo atendi adecuadamente. Particularmente, e demanda for di e campo educativo a crece hopi e ultimo añanan debi na e Ciclo Basico y e Ciclo Avanza, cu ta eherce basta presion riba nos biblioteca pa informacion riba diferente topico cu ta concerni Aruba.

Imigrantenan nobo tambe ta hasi uso di e coleccion.

Nos tin un necesidad grandi riba tur tereno y pa tur nivel pa mas investigacion y publicacion, y esey ta un reto grandi pa nos investigadornan.

Un deseo ferviente cu nos tin ta cu tur publicacion local y coleccion priva valioso ta haya nan caminda pa Biblioteca Nacional Aruba, pa asina por ta disponibel pa henter e comunidad y por wordo conserva pa futuro generacion.

En todo caso, ta importante pa por registra tur coleccionan priva existente. Nos ta aprecia masha hopi cu nos a ricibi dos coleccion cu a duna un gran aporte na nos coleccion nacional, esta e Coleccion Hartog y e Coleccion Ito Tromp.

Pa conclui, nos tin un coleccion cu ya a forma base, tabata fuente di inspiracion y a juda realisa hopi publicacion cu ta riba mercado local y internacional.

Pero ainda tin mas reto nos dilanti pa por sigui cu e trabao. E Departamento Arubiana a crece di tal forma cu e necesidad pa un espacio adecuado ta bira cada dia mas urgente. Pesey tin  proposicionnan concreto pa expande e actual edificio of pa busca otro localidad.

Ta un responsabilidad nacional di nos tur pa conserva, actualisa y haci nos patrimonio documental accesibel. Mientras e ciudadano of organisacion ta brinda nan coleccion di hopi aña, e trabao di nos biblioteca pa sigui colecciona materialnan riba nos pais lo wordo apoya enormente mediante un deposito legal.

Hunto, cu esfuerzonan uni, nos mester fortalece nos coleccion nacional como memoria nacional. Asina so, nos historia por bira un poderoso obra di consulta pa desaroya e Aruba cu nos tur ta desea.

 

 

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn