Mi ta gusta lesa

“Mi ta gusta lesa”

Ideanan y sugerencianan pa stimula lesamento

Lesamento ta importante pa e desaroyo di cada mucha. Lesamento ta yuda desaroya e capacidad pa visualisa, pa pensa y  ta yuda desaroya idioma.

Wim Rutgers tambe ta menciona 4 punto pakico lesamento ta importante den su buki "Mi gusta lesa : jeugdliteratuur van Aruba": 1. Dor di lesa bo ta siña conoce bo mundo mas mihor 2. Dor di lesa bo ta siña conoce bo mes mas mihor  3. Lesamento ta stimula bo desaroyo personal y bo desaroyo emocional  4. Lesamento ta amplia bo conocemento di idioma.

Sa pasa cu un mucha ta indica cu e no ta gusta lesa. Ta dificil pa obliga un mucha pa lesa. E por tin un efecto negativo. Cerca e mucha e por activa resistencia y lo bo no yega bo meta.

Lesamento mester ta un actividad agradabel. Con nos por percura pa mucha ta lesa cu placer. Algun sugerencia:

Lesa pa of cu bo jiu tur dia. Busca un lugar dushi pa sinta, sea pafor riba porch, na laman, den parke. Laga bo jiu(nan) lesa pa bo tambe.

Duna un bon ehempel! Tene hopi material pa lesa tur rond, den cas, den auto, buki y revista pa mucha. Paga e television den vez en cuando laga cada miembro di famia lesa un pida di su buki, incluyendo mami y papi.

Hiba buki y revista pa ora cu mester warda un caminda, cerca dokter di cas, den linea na supermercado y otro caminda.

Lesa e mesun buki cu bo jiu ta lesando y papia riba e buki. Asina ta desaroya habitonan di e mente y ta construi capacidad pa pensa y crea vision, opinion y ideanan.

Laga mucha mes scohe loke nan kier lesa, esaki lo encurasha e lesamento.

Cumpra buki riba cassette of CD, especialmente pa e mucha cu tin dificultad pa siña/lesa. Scucha e material den auto of na cas, paga e television y sinta scucha hunto.

Hiba mucha biblioteca regularmente for di chikito. Hiba nan pa actividad na biblioteca manera contamento di cuenta. Check si bo biblioteca tin un programa vacacional. Por haya sugerencia di un bibliotecaria pa scohe buki.

Abona riba revista di mucha. Encurasha muchanan poco mas grandi pa lesa e pagina di mucha den corant. Pa asina nan custumbra di lesa tur dia y den vakantie tambe. Si nan keda hopi siman sin lesa e desaroyo di e vocabulario no ta sigi crece. Puntra nan regularmente kico nan a lesa anto kico nan ta pensa di locual nan a lesa. Scucha bon kico nan ta conta bo.

Encuresha nan pa tene corespondencia (carchi of e-mail) cu otro mucha (di nan klas kizas). Duna cada mucha carchi cu stampia pa nan por manda otro. Duna nan aceso pa un computer sea na cas, na biblioteca of un otro caminda.

 Encuresha mucha pa traha un scrapbook di nan vakantie. Laga e mucha scirbi un texto cortico bao cada portret, carchi di entrada pa un evento, postcard, etc. Asina nan ta crea un relato completo di nan experiencianan.

Conta cuenta. Conta cuenta prome cu bai drumi y otro ora. Lesa cu expresion usando diferente voz pa e diferente personahenan. Enfatisa riba ritmo di e storia.

Regala buki. Duna mucha buki como regalo. Laga mucha regala otro mucha buki.

Lesa prome cu bai drumi. Anochi prome cu bai drumi laga mucha lesa cuanto cu nan kier. Lag'e bira parti di e ritual pa bai drumi.

Peuters/Chikitin

Tema. Busca buki di cosnan cu e ta gusta. Por ehempel, e ta gusta bestia?, auto? Pero lag'e mes scohe tambe. Si e storia ta mucho largo salta pida.

Ripiticion. Keda lesa storianan bunita di nobo. Mucha chikito ta gusta scucha un storia atrobe. Tambe e ta hasi'e familiar cu e manera con e storia ta construi (hinka den otro).

Interactivo. Durante lesamento para un rato, puntra e mucha con e ta kere cu e storia ta bai caba y hasi otro pegunta. Hasi pregunta riba e plachinan cu e ta mira. Laga e mucha bisa bo e colornan cu e ta wak. Kizas por laga e mucha pinta loke el a scucha.

 

Literatura obtenibel na Biblioteca si ta desea di lesa mas riba e topico di lesamento y contamento di cuenta

Mi gusta lesa : jeugdliteratuur van Aruba / Wim Rutgers

Vertel eens : kinderen, lezen en praten / Aidan Chambers

Vertel eens.... een verhaal / Rimke Rohaan-Mul

Over vertellen en voorlezen / Wim Verlaeckt (red.)

Plezier in boeken / Anton van der Geest

Leesbeesten en boekenfeesten : hoe werken (met) kinder- en jeugdboeken?





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn