Minister Hooyboer-Winklaar: Bula, baila, goza di Carnaval y descansa cu un bon buki despues

Un di e expresionnan mas conoci di e autor famoso Dr. Seuss ta: “Mas bo lesa, mas cos lo bo sa. Mas bo siña, mas luga lo bo bishita.” “Cu e expresion aki den mente, mi kier corda specialmente nos hobennan cu lesamento ta dushi y ta masha hopi ta e luganan cu nos ta bishita lesando buki.

Si bo ta scoge pa e mundo magico di Harry Potter of un stripverhaal di Donald Duck of Suske en Wiske, for di cada storia sigur bo ta siña algo nobo, tanten cu bo ta discubri paisnan y paisahenan fantastico of real,” Minister Michelle Hooyboer-Winklaar a expresa na cuminsamento di e fin di siman mas druk di Carnaval 60.

“Lesamento ta un bon pasatempo tur ora, pero sigur tambe pa sinta relaha of drumi riba cama descansa diadomingo atardi of dialuna, despues di e fin di siman hopi druk di Carnaval,” e mandatario, kende ta encarga cu enseñensa y maneho di famia, ta sugeri. Dialuna ta un dia di descanso, un dia pa disfruta den famia, un dia pa comparti, pero tambe pa momentonan keto, ora tur scol ta cera y hopi mayor ta na cas cu na yiunan.

Pa medio di esaki, Minister Hooyboer-Winklaar kier invita y corda tur hende cu Biblioteca Nacional di Aruba, tanto na San Nicolas, como na Oranjestad ta na servicio di nos comunidad y cu por busca buki ainda prome cu e fin di siman largo, e sea riba diahuebs y diabierna.

Tambe e mandatario kier corda henter nos comunidad cu e fin di siman aki ta uno pa goza y fiesta, pero semper cu siguridad personal y salud di cada persona ta na prome luga. Esaki ta un temporada cu mayoria famia y amigonan ta uni pa celebra e fiesta cultural mas grandi di aña y ta pidi pa tur hende tene cuenta cu esunnan mas vulnerabel den nan famia y corda riba e cosnan basico manera earplugs, sunblock y algo di come  y di bebe. Tur hende por comparti cu otro y na final di dia ta miho tin dimas cu dimenos!

Un checklist basico pa tur famia ta inclui: medicina cu mester tuma diariamente, sunblock, earplugs, pechi of sombre y awa pa bebe, cos di come cu no ta daña lihe cu por inclui algun cos basico manera crackers, cuki y sandwich.

Minister Hooyboer-Winklaar kier corda tur hende pa paga tino cu nos hendenan grandi y muchanan, pa hunta sunblock y pa nan bebe algo y come bon prome cu sali for di cas, pero tambe pa nan come algo y sigur bebe awa durante dia. Ta consehabel tambe pa no come cosnan cu ta mucho vet y e persona no ta custumbra di come.

Minister Michelle Hooyboer-Winklaar ta desea henter nos comunidad y tur nos bishitantenan un dushi fin di siman, disfrutando di tur actividadnan di musica, jump-upnan y e buniteza, luho y creatividad cu ta wordo presenta pa nos gruponan di Carnaval.

Minister Hooyboer-Winklaar ta conclui, “Tene na cuenta cu mantene un bon balans den nos bida tur dia ta importante. Pa nos bida diario y sigur pa e temporadad aki, mi kier comparti cu boso e bunita expresion aki di e filosofo, autor y historiador Frances Voltaire: “Lesa, y ban baila; dos diberticion cu nunca lo haci mundo ningun daño.”

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn