Monica Maria Clarinda

Mi a nase na Kòrsou dia 9 di mei 1961. Mi mayornan, Salvador Clarinda i Estebana(Nelly) Clarinda-Kock, ta Boneriano i ta rib’é  isla’ki mi a ser kriá. Komo mucha mi tabata gusta lesa buki i pinta. Dia ku mi tabatin 16 aña di edat, mi a bai Kòrsou pa haña estudio preparatorio den enfermeria. Na edat di 18 aña mi a bai Hulanda pa sigi ku estudio avansá den enfermeria. Na Hulanda mi a gradua komo enfermera profeshonal i komo dosente den enfermeria.

Na febrüari di 1990 mi promé yu ta nase na Rotterdam. E idea pa skibi buki pa mucha tambe ta nase, pero debí ku mi tabata muchu okupá ku mi yu i trabou mi no a logra kumpli ku e deseo ei. Na febrüari di 1994 mi di dos yu ta nase na Boneiru i e idea pa skibi buki pa mucha ta bolbe bini den mi mente, pero atrobe mi ta muchu okupá ku kriansa di dos yu.

Na kuminsamentu di aña 1998 mi a haña tempu pa kuminsá ku preparashon pa mi promé buki pa mucha.

Den fin di añanan 90 Bòi Antoin, eskritor, outor i historiadó, tabata públikando hopi buki tokante historia di Boneiru i islanan di Antia Hulandes. Esei a inspirá mi pa skibi buki pa mucha tokante historia di nos islanan. Na aña 2000, 2002 i 2006, mi ta  publiká tres buki pa mucha tokante historia di e islanan di Antia Hulandes. Mi promé buki, ‘Nona Ta Konta’, ta konta tokante e Indjannan komo promé habitante nan dje islanan, tambe e ta konta tokante e Spañónan i por último e Hulandesnan ku a konkistá e islanan. E di dos buki ta konta tokante Sklabitut. I e último buki den seri di Nona ta konta, ta bai tokante ‘Nabegantenan’. For di 2010 mi a skibi i ilustrá un buki pa mucha ku yama Nona Spesial, pero no a públika esaki ainda. Den luna di Novèmber di 2015 mi a públika un buki informativo, ku yama ‘Welo ta lubida’, pa chiki i grandi tokante e malesa Alzheimer. Esaki ta sosodé ku yudansa finansiero di Fundashon Alzheimer Bonaire. 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn