Museo habri Dia di Himno y bandera

Poniendo enfasis riba nan rol di trece e comunidad mas cerca di su herencia y historia Museo Arqueologico Nacional Aruba, Museo Historico y Stichting Rancho e aña aki atrobe lo habri nan portanan riba nos Dia Nacional di Himno y Bandera, 18 di Maart.
 

A scohe e tema di ‘Collections make connections’ como uno general pa 2014. E tema aki ta proveniente di e ‘International Council of Museums’ (ICOM) pa enfatisa cu e coleccionnan warda y presenta den e.o. Museonan, ta conecta comunidad na custumber y tradicionnan di awendia, ta conecta diferente gruponan etnico den comunidad, - diferente generacionnan, habitantenan di diferente pais den region y hasta ta conecta continentenan cu otro. E colecionnan no ta conisisti solamente di artefactonan pero tambe di storianan, informacion y hasta construccionnan.
Museo Arqueologico Nacional lo habri su salanan di exposicion e biaha aki cu e Staff y boluntarionan di Museo contando e bishitantenan riba 18 maart 2014 riba nan ‘obhetonan favorito’. Tin alrededor di 600 obheto den e exposicion permanente di Museo y aunke tin informacion di esakinan den e exhibicion mes, tin hopi informacion mas, por ehempel relato di unda y con a haya esakinan y hasta anecdotanan cu ta interesante pa publico conoce. Door di combersa cu publico riba 18 di Maart, Museo kier duna e obhetonan aki ‘bida’ y ‘conecta’ esakinan cu nos comunidad moderno. Pa esnan cu nunca  a bishita Museo Arqueologico Nacional na Schelpstraat esaki ta un bon oportunidad. Esnan cu a bishita un of mas biaha caba lo haya chens pa ‘mira’ e obhetonan di un forma diferente. Banda di difruta di e exposicion henter famia por pasa un rato ameno hasiendo manualidadnan inspira door di e obhetonan den e coleccion di Museo.

 

Na Museo Historico den Fort Zoutman, nos hobennan lo ta presente pa ‘conecta’ un y  tur na ‘Xpo 1880’, un exposicion cu ta un ehempel sublime di con un Museo ta conecta e generacion di futuro cu esun di antaño. Desde apertura di e ‘Xpo 1880’ ela ser bon bishita pa scolnan y demas publico y tur esnan cu no a alcansa pa wak’e ainda por hasi esaki  riba 18 di Maart. Na San Nicolaas ‘Community Museum’ tambe lo ta habri e dia aki.
Hunto cu e Museonan, Stichting Ranchoo ta activo na e ‘Forno di Kalki’ y cu pustamento di boto miniatura. Den e proximo dianan lo duna mas detaye, horario etc. di tur e actividadnan aki.
 
 

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn