Na caminda pa e fiesta grandi

Gino Vrolijk den Festival di Buki pa Mucha

Den cuadro di e festival di buki cu ta tuma lugar di dia 4 di november pa dia 8 di november proximo, Biblioteca Nacional Aruba ta duna informacion di e autornan cu ta participa den e festival y cu ta bishita e diferente scolnan na Aruba durante e siman aki. Cada aña e festival tin otro tema y un grupo di autor, ilustrador y contado di cuenta di buki pa mucha for di Aruba, Antiyas, Hulanda y otro pais ta bishita mas cu sesenta scol pa un siman largo. Buki Buki den wega, pianan na careda! E tema e aña aki ta, Deporte y Wega. Den e edicion aki ta introduci Gino Vrolijk:

Gino Vrolijk a nace na 1973. Su nomber di cariño ta Gino. El a studia na Instituto Pedagogico Arubano (IPA) y a termina su estudio na aña 1999 como e prome meneer di kleuterschool den e historia di enseñansa di Aruba. Gino Vrolijk a cuminsa traha na Colegio Hilario Angela. Di tempo ey semper su deseo tawata pa a bay traha den Desaroyo di Curiculo un seccion di Departamento di Enseñansa. Y despues di 4 aña trahando den 1ste klas su deseo a keda cumpli. Gino Vrolijk a traha 4 aña na Desaroyo di Curiculo. Eynan el a haci diferente trabou den cuadro di innovacion pa enseñansa primario. Por ehempel traha les pa scol y duna presentacion na e maestronan di scol riba e importancia di Papiamento den enseñansa. Actualmente Gino Vrolijk ta cabesante di Fontein Kleuterschool na San Nicolas. Marcando historia un bes mas, como e prome meneer cabesante di un kleuterschool den e historia di enseñansa di Aruba.

“Sumpi, e wanglo sabi” (2007) ta e prome buki cu Gino Vrolijk a skirbi. E idea pa e storia a bini ora el a corda con e tabata hunga y pasa tempo den e cunucu di su welo. Locual e no por lubida ta e cantidad di bes cu el a trapa riba wanglo.
‘Na caminda pa e fiesta grandi’ ta e buki cu Gino Vrolijk a skirbi pa e Festival di buki 2013. E ta ilustra pa Melusina Gunsam-Peijs. E buki aki ta un regalo pa Aruba y p’esey mucha por hay’e gratuitamente cu cada compra di un of mas buki di mucha na un di e librerianan participante y desde e apertura oficial di e Festival di Buki pa Mucha 2013 tanten cu tin den stock. ‘Na caminda pa e fiesta grandi’ ta Gino Vrolijksu di dos buki y ta un honor grandi p’e cu el a haya e oportunidad pa skirbi e Regalo di Siman di Buki pa e Festival di Buki di Mucha di Aruba pa aña 2013.

Na caminda pa e fiesta grandi13 autor y contador di storia ta bishita diferente scol na Aruba durante un siman largo. Nan ta (Aruba) Liliana Braamskamp-Erasmus, Emerita Emerencia, Diana Marchena, Munye Oduber Winklaar, Robert Reeberg, Gino Vrolijk. Boneiro: Kathleen Tielman, Corsou: Ariadne Faries, Tio Ali (Alvin Inecia), Costa Rica: Carol Britton y di Hulanda ta participa: Fred Diks, Lydia Rood, Anna Woltz. E autornan di e festival lo bishita e scolnan y tambe lo presenta nan mes, pa  parti merdia na biblioteca di Oranjestad y e filial na San Nicolas.
 

Biblioteca ta trece un otro edicion di e famoso festival di buki pa mucha cu e meta pa stimula mucha pa lesa y pa stimula combersacion y interes pa autor di buki pa mucha. Festival di Buki pa Mucha 2013 ta priminti di ta uno hopi interesante y educativo, tanto pa e mucha- su mayor- como pa e maestronan.

 

 

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn