Niemand wandelt ongestraft onder palmen.

Diahuebs, 21 di januari 2016, di 7or pa 10or di anochi lo tin presentacion di e obra literario/historico ‘Niemand wandelt ongestraft onder palmen’, skirbi pa Millicent (Dudi) Smeets-Muskus. Esaki ta tuma lugar na Biblioteca Nacional Aruba, George Madurostraat. E subtitulo ‘Opkomst en verval van het struisvogelpark ‘Albertina’ op de Curaçaose plantage Choloma (1912-1931)’ ta haci referencia na e florecemento y decadencia di e parke di avestruz ‘Albertina’ na e plantashi Choloma na Corsou di 1912 pa 1931.

Como orador lo fungi dr. Wim Rutgers y sra. Millicent (Dudi) Smeets-Muskus. Lo tin charla, documentario y musica. E parti musical lo ta na encargo di Vivian Lampe, Livio Hermans, Johnny Scharbaay y Etty Toppenberg. Co-organisado y persona di contacto ta Mirto Laclé (tel 7402044). Pueblo en general ta bon-bini. Entrada ta gratis.

E autor Millicent mes lo trata e ‘Bida y sufrimento di e benefactornan den tempo colonial na Corsou.’ Mas o menos na 1999 sra. Millicent Smeets-Muskus ta haya algun carta den e archivonan di Fortkerk y Verenigde Protestantse Gemeente (VPG) na Corsou. E cartanan ta contene informacion cu bale la pena investiga. Pa su gran asombro y alegria, señora Millicent ta testigo di un documentario Hulandes na television produci pa señora Anna Abrahams na 1998. E documentario cu ta hiba e titulo “Tropengraf, een West-indische overlevering’, ta trata di un caso masha tristo mes di fayecimento di un hoben hulandes, Wim Lensvelt di apenas 25 aña. Wim Lensvelt ta dera den santana protestant na Berg Altena desde aña 1913.

Millicent Smeets-Muskus a busca contacto cu Anna Abrahams na Hulanda y tambe cu descendientenan di famia Lodewijk Lens y su señora Ida Lens-Bernhard, Dr. Leo Lens y Wim Lensvelt. E morto misterioso di Wim Lensvelt na plantashi Choloma no a keda resolvi.

E descendientenan di e cuater personanan principal envolvi directamente cu e parke di avestruz Albertina a duna sra. Millicent cooperacion total pa e por a haci investigacion y realisa un obra historico relaciona cu e nacemento, desaroyo, cristalisacion y al final, decadencia di e parke di avestruz ‘Albertina’ na e plantashi Choloma, Corsou.

Pa medio di documento, memoria y entrevista sra. Millicent a trata di crea un imagen y portreta e cuater personahenan principal di e obra historico aki. Cuater persona cu un curashi y dedicacion increibel.

Tambe sra. Millicent ta haci referencia na e migrantenan di Lituonia pa Oudtshoorn (Sur Africa), cu a hiba e industria di plumanan di avestruz  na un florecemento exitoso. E descendientenan di e migrantenan aki ta biba na Oudtshoorn, Sur-Africa te cu dia di awe.

E obra historico Niemand wandelt ongestraft onder palmen no ta solamente un obra encuanto un historia importante di un famia hulandes-aleman, sino tambe e ta contene un imagen di un epoca di e isla Corsou na comienso di Siglo XX cu su contrastenan social-economico y alabes e moda di pensa, e mentalidad pa dicho tempo. Segun sra. Millicent un mentalidad cu den temponan aya tabata considera ‘normal’, pero cu awendia nos ta distancia nos mes di dicho forma di pensa.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn