Olga Buckley

Olga BuckleyOlga, yiu di Harold J. Buckley y Ramona Guilarte a nace na Aruba dia 23 di maart 1950. E tin tres yiu muhe, Zahira, Yassira y Indra. Como maestro di scol pa hopi aña trahando den enseñansa special, semper el a encuresha su alumnonan pa kere den nan mes. Finalmente e mes a tuma e curashi pa publica algun di su poemanan.

Sra. Olga Buckley ta e escritor di 'Curashi' un coleccion di poesia y 'Bencho ta dual' un buki pa mucha. Biblioteca tin tur dos bunita publicacion den su coleccion. Pa nos bishitantenan conoce e autor aki un poco mas mihor nos a haci un entrevista cu Olga. Nos ta invita nos bishitantenan pa lesa e bukinan di e escritor y poeta aki.

Bo por conta algo di bo personalidad?
Mi ta un hende hopi positivo, den tur cos menos agradabel mi ta busca algo bon pa compensa. Mi ta purba canalisa mi bida den direccion positivo, mirando obstaculonan y experiencianan negativo como lesnan pa crece. Mi ta kere den hende y ta gusta stimula hende. Mi tin un caracter fuerte, pero den sentido di persevera. Mi por ta 'koppig' si mi tin un proyecto den mente mi kier hacie sin mucho tardansa y mi ta hinca alma y curpa aden. Mi ta gusta yuda hende y mi ta creativo.

Kico ta contribui na bo gozo den bida?
Hende. Mi famia, mi yiunan, conoci. E diferencia cu mi por a haci den bida di e mucha en general y principalmente e mucha special den e 32 añanan cu mi a traha den ensenañsa. Y e echo cu mi por skirbi y comparti.

Olga a traha hopi aña den ensenansa special. Olga ta haya falta di e muchanan special? Kico bo a siña di bo alumnonan, con nan a forma bo?
Mi ta haya hopi falta di e muchanan di enseñansa special. Mi a siña hopi di nan, principalmente cu no ta importante loke bo tin na inteligencia, pero loke bo ta haci cu ne. Mi a siña di ta gradicido cu cosnan chikito y aprecia cosnan mas grandi manera un bendicion. Ora mi topa ex-alumno y nan ta comparti cu mi cu nan desaroyo di bida a bay den un forma positivo, ta pa mi e prueba cu perseverencia y kere den bo mes ta paga.

Con Olga a usa su experencia cu mucha den 'Bencho ta dual'?
Sin wak patrasMi ta purba di laga e mucha identifica su mes cu Bencho y comparti e moral di e storia. Mi ta purba laga e mucha experencia cu den situacionnan cu ta fastioso of ta parce sin salida semper nos ta topa sernan cu kier duna nos un man. Tambe cu maske bo haci algo menos bon, tin pordon y bo por sigui dilanti. Principalmente cu honestidad ta hopi importante. Y cu nos tin cu tene cuenta cu otro, sea bestia of hende.

Olga a sigui algun curso den skirbimento?
No, mi no a sigui ningun curso di skirbimento. Pero mi a traha hopi riba desaroyo di material den enseñansa special, specialmente storia y material pa lesa. Semper mi a gusta skirbi y lesa.

Con lo bo encuresha....of kico lo bo conseha hende cu tin un pasion pa skirbi pa sigui? Tin algun tips practico?
Si, lesa hopi. Traha bo plan di skirbi. Busca literatura riba con pa skirbi. Y gewoon cuminsa skirbi. Tin un fundacion cu ta duna curso di skirbimento. Mi ta kere si cu bo mester cierto talento. Y cu por desaroya esaki. Tin hende cu tin e talento, pero cu tin biaha no sa esaki. Of no tin e curashi pa saca esaki afo.

Con bo a experencia e proceso di publica un buki? E tabata dificil?
Pa ta sincero, a pesar cu a tarda hopi prome cu 'Bencho ta dual' a keda publica, mi tabata tin hopi suerte na final cu e publicacion. Pa varios aña mi tabata busca forma sin a logra. Finalmente mi a bati na porta di UNOCA y mi a wordo ricibi cu brasa habri. Na Hulanda mi a topa un persona cu sin ningun interes personal a lobby pa mi cerca un imprenta, pa a imprimi e buki di un nivel halto y bon calidad na un prijs simpatico.

Kico nos por spera di Olga den futuro? Olga ta trahando riba buki di mucha of poesia? Kico ta bo soño of meta cu bo kier logra den un futuro cercano?
Mi tin varios proyecto den mente y ta trahando riba e plataformanan. Tanto buki di mucha di poesia (ta cla pa imprimi) y novela/biografia. Mi soño ta pa por contribui na un cultura di lesamento na Aruba.

Kico Olga ta prefera, skirbi pa mucha of pa adulto?
Tur dos, pa ta sincero. Pa mucha bo por, mi ta haya, laga bo imaginacion cana un caminda mas liber.

Unda bo poemanan di amor ta?
Nan ta scondi den diferente poesia, tambe den e tomo cu ta na caminda.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn