Olga Orman den festival di buki pa mucha

Biblioteca Nacional Aruba a invita Olga Orman pa participa na e festival di buki pa mucha. Orman lo bishita diferente scol den e siman di dia 5 pa dia 9 di November pa duna presentacion.

Olga Orman a nace na Aruba y ta biba for di su 14 aña na Hulanda. Orman ta presenta cu contamento di storia y declamacion di poesia riba diferente stage ya for di 1983. El a publica storia, prosa y articulo riba diferente tema.

Publicacionnan ta encera: ‘E biaha largu pa djeipei’ (1994) hunto cu Jos van Hest, cu a skirbi e version Hulandes ‘De verre reis naar heel dichtbij’. ‘Hoe Anansi de ogen van de koning opende’ (1996), ‘Hoe Anansi het Tumbafestival won/Kon Nanzi a gana festival di tumba’ (1998) Hulandes y Papiamento y ‘Michi’ (2009). Orman ta un fiel participante di e festival di buki na Aruba y Corsou caminda e ta purba pa mas tanto laga e muchanan expresa nan mes pa medio di pintamento y wega. For di 2001 e ta miembro y secretaria di e grupo di escritor 'Simia Literario'. Orman ta hopi contento cu e por contribui e aña aki atrobe na e festival.

Biblioteca Nacional Aruba ta presenta e di binti edicion di e festival di buki pa mucha pa stimula lesamento na Aruba. Otro autornan y contador di storia riba programa ta Hulanda: Mylo Freeman, Tjibbe Veldkamp, Evelien van Dort y Sjoerd Kuyper. Corsou: Tio Ali (Alvin Inecia), Roland Colastica. Boneiro: Tio Gabi(Gabriel Mercera), Kathleen Thielman. St.Maarten : Loeki Morales, Surnam : Hilli Arduin, Jamaica : Amina Blackwood Meeks, Aruba: Robert Reeberg, Olga Buckley, Desiree Correa, Mariebelle Arends, Dolfi Kock, Dora Lauffer-Mathilda, Noris van Lis-Donata.

Pa despues di merdia biblioteca ta ofrece un programa atractivo tanto na Playa como San Nicolas. Muchanan cu no ta haya un bishita di autor na scol por bini biblioteca durante e siman di festival.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn