Opa y Oma, conta mi y inspira mi

Biblioteca Nacional Aruba a invita diferente autor di buki pa mucha y ilustrador pa duna contenido na e festival grandi di buki. Preparacionnan ta tumando lugar pa un festival di buki cu ta duna atencion na welo cu wela di cada mucha.

For di Hulanda biblioteca a invita Evelien van Dort, Jeroen Hoogerwerf y Mylo Freeman. For di Corsou biblioteca ta spera Leo Regals y Roland Colastica. Muchanan lo cera conoci cu Monica Clarinda for di Boneiro. Di Surnam ta bini dos autor, Indra Hu-Ramdas y Sandra Purperhart. Biblioteca ta conta cu participacion di autor y ilustrador local tambe. Nuebe persona ta duna presentacion pa entretene muchanan di scol. Nan ta Gino Vrolijk, Rudyomar Leysner (ilustrador), Irmgard Frans, Sergio Tjie-A-Loi, Richard Dabian, Mariebelle Arends, e pareha Dolfi y Belen Kock-Marchena, Vanessa Paulina (ilustrador y artista visual) y por ultimo Liliana Braamskamp-Erasmus. 

Liliana Braamskamp-Erasmus y Jeroen Hoogerwerf hunto cu ilustrador Marielle van Beek a publica e buki ‘Overal opa’s en oma’s’. Esaki a keda publica recien y ta un coleccion di storia y poema pa mucha.

E aña aki e autor di e serie di buki pa mucha ‘Koen Kampioen’ y ‘James Blond’, sr. Fred Diks, ta skirbi e buki pa e Festival d buki pa mucha 2016. Rudyomar Leysner ta ilustra e buki di e festival. Pronto esaki lo ta cla pa presenta. Lema di e festival ta ‘Opa y Oma, conta mi y inspira mi’. Cu e lema aki ta pone atencion riba e famia, welo cu wela cu por yuda nan nietonan activamente cu lesamento door di lesa pa y cu nan y conta storia. E logo pa e festival ta di Ryan Oduber. 

Apertura di Festival di buki pa mucha ta tuma lugar diabierna atardi dia 28 di oktober. Scol Prinses Amalia ta duna un presentacion durante apertura. Autornan ta bishita scolnan participante (den siman di 31 di oktober pa dia 4 di november) y den oranan di atardi tin actividad pa mucha na biblioteca caminda tur mucha ta bon bini. Pa e clausura muchanan di St. Dominicus College ta duna un presentacion.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn