Opa y Oma, conta mi y inspira mi

Biblioteca Nacional Aruba ta wak bek riba un Festival di Buki pa Mucha hopi impactante. E Festival di Buki pa Mucha ta un di e proyectonan mas grandi di biblioteca y ta rekeri basta preparacion pa un siman cu tanto actividad por cana bon. Es mas, tabata parce e siman di mas calor na Aruba cu nos a experencia na 2016.

Ta purba pa yega na mas tanto mucha cu ta posibel, pa medio di bishita di autor y ilustrador na mas cu 60 scol. Sesenta scol ainda ta alcansabel aunke cu e ta pidi hopi di cada presentador. Cada un di nan ta tene como 4  presentacion mainta y algun tin tambe 1 presentacion atardi na biblioteca. Mayoria ta bay cas bon cansa pero satisfecho pa por a topa y comunica cu tanto mucha y mayor. Na fin di siman tin evaluacion cu tur autor y tin evaluacion na scol tambe. E aña aki biblioteca a presenta un grupo di 17 autor y ilustrador, di Aruba (por cierto un grupo creciente), di nos region Caribense y di Hulanda.

Ta scohe tur aña un tema special pa Festival di Buki pa Mucha, Aruba a semper a haci e escohencia pa mantene e tema cu ta uza na Kinderboekenweek di Hulanda. Asina a duna atencion na welo cu wela e aña aki, otro aña biblioteca ta traha cu e tema ‘Griezelen’. Tur aña ta produci un buki pa mucha den cuadro di e tema.

Ta enfoca pa stimula lesamento durante henter e aña  cu actividad pa mucha na biblioteca mes, tur siman y ta duna sosten na bibliotecanan escolar.

Pa por realisa un proyecto asina biblioteca tin un presupuesto pa cubri parti pero mester busca fondo tambe. E otro parti ta cubri pa medio di patricinador for di sector priva. Organisacion den sector priva y enseñansa cu ta mira e importancia di lesamento y desaroyo di idioma pa mucha por sigui siña. Biblioteca Nacional Aruba ta gradici e sponsor principal FCCA y tambe RBC Royal Bank, Guardian Group, Kiwanis Club of Palm Beach, Samson Bookstore, De Wit & Van Dorp, Bruna, Deloitte, Levendig Uitgeverij, Divi Impact, Plaza Bookshop, Quota Int’l of Aruba, Lotto, Aruba Bank, Thiel Materials N.V., Cocoplum restaurant, Banco di Caribe, Meta Corp,  Proffessional Pest Control, Plus Accountants, De Palm Tours, George Car Rental, El Gaucho restaurant, Thrifty Car rental, Zeerovers restaurant, Stichting Munira, Subway, The Kitchen, Italo, The Westdeck, Hyatt Hotel, TUI.

Sin tur e sponsornan aki biblioteca lo no por a realisa e proyecto aki. Tambe a bende un rifa, e aña aki e ganadornan ta: Ester Koolman, Ivan Boekhoudt, y Rosemary Everon. Hopi sosten y contribucionnan ta bini den forma di tempo y energia, biblioteca por conta cu un grupo di boluntario, guiador y personanan cu di un of otro forma ta yuda. Biblioteca ta traha hunto cu hopi scol pa e parti organisatorio. Un danki masha grandi ta bay na tur. Masha masha danki.

Cu participacion di alumnonan di Sint Dominicus College, Tio Ali, Gino Vrolijk y Sergio Tjie-A-Loi a clausura Festival di Buki pa Mucha cu e tema Opa y Oma, conta mi y inspira mi. Nos a yama ayo na tur e autornan, ilustradonan y contadonan di cuenta procedente di Hulanda, Corsou, Boneiro, Surinam y nos autornan local cu a participa na Festival di Buki pa Mucha 2016. Nos a haya un bunita evaluacion di tur esnan cu a participa y tambe nan tabatatin palabra di elogio pa tur e guiadorrnan. Un danki na un y tur cu a yuda cu hopi entusiasmo, na e miembronan di comision y ful personal di BNA.

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn