Ora Baka tin Lechi , Esú e ta krepchi

Presentacion di buki na biblioteca

Ora Baka tin Lechi , esú e ta krepchi’

Diaranson anochi dia 20 di maart tin e presentacion di e buki ‘Ora Baka tin Lechi, esú e ta krepchi’ di e autor Irmgard Swakhoven-Troeman na Biblioteca Nacional Aruba. E autor di e buki aki ta e orador pa e anochi y invitadonan ta sr. Mirto Lacle y sr. Wim Rutgers. E presentacion ta cuminsa 7or y mey di anochi y un y tur ta bonbini na biblioteca.

‘Ora Baka tin Lechi, esú e ta krepchi’: Oralidad den obra di Doble R., tabata e tesis di Sra Swakhoven-Troeman pa obtene su Master Degree na Universiteit van de Nederlandse Antillen. Sra. Swahoven-Troeman a cuminsa su carera profesional como docente na Corsou y actualmente e ta docente na Universtiteit van de Nederlandse Antillen. E trabou aki ‘ Ora baka tin lechi, esú e ta krepchi’ ta corona di Irmgard su pasion pa e idioma ? su mama.            

Troeman kier a duna un contribucion na literatura cientifico cu su tesis. Sra. Troeman a analisa e diferente obranan di Doble R y e impacto cu esakinan tin riba literatura y cultura di Corsou. Den su analisis sra. Troeman a analisa 32.750 palabra y 126 pagina di texto. Sra. Troeman a para keto na e diferente estilonan di rima cu Doble R ta usa, manera rima crusa, rima brasa, etcetera.

Tambe e parti di personificacion ta bin dilanti caminda por ehempel Shell ta bira hende. E parti biblico ta haya un lugar special den e obranan di Doble R. Den e contexto aki un di e obranan mas bunita di Doble R ta ‘Rei Salomon’. Paul Brenneker y Elis Juliana tambe tabata inspiracion pa diferente obra di Doble R, manera ‘Djasabra’, ‘Zamalakitoki’, ‘Zananatoni’ y ‘Simadan’. Sra. Troeman su deseo ta cu Papiamentu den su totalidad bira un herencia cultural.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn