Otro edicion di Proyecto Conta cuenta na Casnan di Anciano

Na biblioteca bibliotecarianan ta cla cu e organisacion di un otro edicion di e proyecto anual Conta cuenta na casnan di Anciano. E proyecto lo wordo ehecuta entrante apil. E proyecto Contamento di cuenta pa nos grandinan ta un proyecto cu e meta pa stimula lesamento y contamento di storia.

Bibliotecarianan di Biblioteca Nacional Aruba hunto cu autornan local y poeta ta bishita e casnan di anciano y ta presenta un programa di 1 ora cada siman. E programa ta varia cu contamento di cuenta, declamacion di poesia y na final ta pasa un documentario cortico. E proyecto tin un duracion di 3 luna.

Diahuebs awor, dia 4 di april sra. Frida Vrolijk ta cuminsa cu su presentacion na Maristella na Savaneta. Sra. Frida Vrolijk ta duna 4 presentacion. Na mei sra. Ruthy Vrieswijk-Bergen ta duna 4 presentacion na diferente cas, sigui pa sr. Roberto Croes cu ta duna diferente presentacion na juni.

Sra. Frida Vrolijk tin hopi aña ta skirbi poesia, haiku y cuenta y e tin hopi aña ta presenta su publicacionnan. Pa sra. Vrolijk e ta un gran placer pa por declama pa hende grandi. Riba su mes, dos bes pa siman e ta bishita grandinan pa declama, conta storia, toca cuarta y canta.

Frida, pa su presentacion, ta conta e storia titula ‘E kabouternan chikito y sapate’. E ta declama e poemanan ‘Bandera “Aruba dushi tera”, ‘nos cultura’, ‘Mama tera’. Despues e ta toca riba su cuarta y ta canta 3 cantica titula ‘Don Pancho Pica flor”, ‘Alabre’ y por ultimo “Nos Arubianonan”.

Despues di e presentacion di Frida ta pasa un documentario cortico cu un tema di cultura di Aruba of historia di Aruba. Esaki ta un produccion di Servico Audiovisual di Biblioteca. Dor di wak e documentario di un faceta di historia cultural di Aruba hopi recuerdo lo bin ariba cu por comparti. Otro meta di e proyecto aki ta pa yuda tene e habitantenan di e casnan socialmente activo banda di promocion di lesamento.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn