Pasonan pa spaar coriente na biblioteca Playa

Proyecto piloto TNO Caribbean

Biblioteca Nacional Aruba (BNA) ta tumando pasonan actualmente pa reduci su consumo di coriente, cu sosten di TNO Caribbean. E instituto estableci na Aruba ta dirigiendo un proyecto piloto na BNA, unda ta enfoca riba factornan relativamente simpel pa ehecuta. Por ehempel, optimalisa e maneho di clima pa medio di miho mantencion, hisa temperatura cu algun grado y instalacion di timer pa asina percura cu e airconditioning ta paga den oranan di anochi, ora cu no ta uza e espacio di BNA. Ademas, hunto cu e pasonan aki, den ultimo lunanan a cambia tur e lusnan, tanto paden como pafo pa lampinan LED, den cuadro di proyecto Philips. E trayecto completo ta monitorea pa aparatonan special di TNO Caribbean, di forma cu por midi e reduccion di consumo detayadamente.

E proyecto piloto di BNA ta sigui despues di analisis haci pa TNO na 2015 riba e potencial di spaarmento di energia den edificionan publico. A traha e raport riba peticion di Pais Aruba y a selecta 25 di e edificionan publico, di e 155 en total, cu tabata gasta mas coriente. Despues a ehecuta un audicion energetico riba e 25 edificionan aki. BNA tabata un di nan. Den e raport a conclui, cu si haci un inversion di un solo biaha di mas o menos 550 mil florin na tur e edificionan aki, combina lo produci un reduccion substancial di gasto di coriente. Ta calcula cu por spaar caha publico no menos cu 1.4 miyon florin pa aña na consumo di coriente. Lo por logra esaki door di ehecuta algun medida relativamente simpel, manera regula luznan, percura pa mantencion apropia di e sistemanan di airconditioning, regula temperatura y instalacion di timers.

Experto di ambiente urbano di TNO Caribbean, Jennifer Boekhoudt, a bisa cu “eficiencia energetico ta hunga un papel importante den cualkier asercamento di energia duradero. E coriente mas barata, ta e coriente cu no ta wordo consumi. E prome paso ta y mester ta semper pa mira con por gasta menos coriente. Y den ambiente di construccion, esaki no ta diferente. Ainda na 2016 ta pone mucho poco atencion na eficiencia di energia den edificionan na Aruba. Esaki ta un oportunidad perdi cu mester cambia. Inversionnan den procesonan dirigi na spaar coriente ta mucho mas efectivo pa costo, compara cu inversion den generacion di energia duradero pa medio di fuentenan alternativo. Y e ambiente di areanan construi ta duna nos un oportunidad unico pa saca hopi probecho a cambio di gastonan relativamente mas abou”.

Segun TNO Caribbean, Pais Aruba, cu BNA como proyecto piloto ta na bon caminda pa tuma e prome paso na un portofolio di edificionan publico. Na solamente sector publico por probecha di e pasonan aki. Sector priva tambe por siña hopi di e proyecto aki y haya stimulo pa tuma accionnan comparabel pa asina por baha e gasto di consumo di coriente.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn