Penchi, e conenchi cu su skeiro di djente

Autor di buki pa mucha sr. Gerald (Gerry) Franca ta presenta su buki nobo titula ‘Penchi, e conenchi cu su skeiro di djente’. Un buki di mucha sumamente colorido yen di aventura di Penchi e conenchi. Sr. Franca a yega na e idea aki hunto cu su yiu muhe, Jerrely Franca. Cada uno a aporta cu nan conocimento y asina logra "Penchi e Conenchi cu su skeiro di djente’ bira un realidad. Franca kier stimula lesamento na Papiamento cerca muchanan? y alabes enfatisa e importancia di un bon salud oral.

Gerry Franca a splica cu e Ilustracion tabata den man di dos amiga di su yiu muher, Reineline ‘Lientje’ Maduro y Irelle Partodikromo. Lientje den un tempo corto a logra pinta tur e dibuhonan riba canvas y Irella tabata guia y duna sosten durante e proceso.

Coreccion y redaccion tabata den man di sra. Desiree Correa. Desiree ta un escritor di buki hopi conoci. Desiree Correa a skirbi un resumen pa e portada di e buki pa duna un idea di e storia. Franca ta agradeci Susana Ruiter kende a haci e “layout” di  e buki  hunto cu Jerrely y a gui’e ’ pa un otro biaha e mes por haci’e. Tabata dianan largo cu nan a traha riba esaki. Luis Meija a saca e potretnan di e canvas pa por haci esaki digital y Rodolfo Silva a edit algunpotret. Asina un team di artista a yuda realisa e produccion aki.

Franca su prome buki tin como titulo ‘E storia di Carlito y e tapadera’ cu temanan similar na e di dos buki ‘Carlito ta bay keiro.


Biografia

Gerald D. Franca (’51) ta bin di un famia di 10 ruman. Gerry a nace y a lanta na Schelpstraat 38 y aki el a biba te cu 1975. E ta tata di tres yiu, Ryan, Bryan y Jerrely Franca.

Na aña 1975 e la bay studia na Bogota, Colombia pa por logra un di su soñonan, El a bay studia na Universidad Externado de Colombia y na Universidad Pontificia Javeriana. Na aña 1982 Gobierno a dune e encargo pa habri e prome oficina di Turismo di Aruba na Bogota, como director. Na aña 1988 el a bay biba na Merca (Chicago, Illinois) cu e mesun reto aki ?.

Despues di a permanece na Merca un temporada el a bin biba bek na Aruba, debi na salud di su mayornan. Semper el a gusta aporta den comunidad. El a forma parti di directiva di algun federacion. Na aña 2003 el a wordo eligi como presidente di Aruba Sport Unie cual puesto e ta ocupa te dia di awe. Actualmente e ta forma parti di directiva di Comision di Subsidio, Piscina Olimpico, Comision Premio Excelencia den Deporte y Conseho Nacional di Deporte y Salud.

E ta disfruta den su ora liber di e deporte Pickle Ball, skirbi buki y recorda e epoca di su infancia y hubentud. El a publica dos buki pa mucha na Papiamento, ‘’ Carlito y e tapadera’ y ‘ Carlito ta bay keiro’. E ultimo ta na benta na Van Dorp y De Wit Stores pa solamente 20 florin. Penchi, e conenchi cu su skeiro di djente’ ta e di tres buki pa mucha di Gerald (Gerry) Franca.

Riba potret Gerry Franca y Jerrely Franca ta entrega directora di Biblioteca Nacional Aruba, sra. Astrid Britten un ehemplar di e buki nobo titula ‘Penchi e Conenchi cu su skeiro di djente’.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn