Pierre Lauffer ; Het bewogen leven van een bevlogen dichter

Diamars dia 29 di april pa 7or y mey di anochi tin presentacion di e buki titula ‘Pierre Lauffer ; Het bewogen leven van een bevlogen dichter’ na Biblioteca Nacional Aruba. Esaki ta un publicacion di sra. Bernadette Heiligers.

E autor di Corsou Pierre Lauffer (1920-1981) tabata  bon conoci den mundo literario den Reino Hulandes. El a skirbi poesia y prosa na Papiamento casi henter su bida. Fundashon Pierre Lauffer na Corsou a publica diferente obra pa duna e autor y poeta aki mas publicidad manera Kantika pa bientu / Liederen voor de wind, un obra di poesia den dos idioma y tambe Na final di kaminda / Aan het einde van de rit. Cu e biografia di Bernadette Heiligers tocante Pierre Lauffer, su bida ta bira accesibel pa un publico grandi. E persona cu lesa e poesia di Pierre Lauffer ta comprende mesora e entusiasmo di Fundashon Pierre Lauffer. Pierre Lauffer ta un di e poetanan grandi cu a percura pa Papiamento bira parti di literatura mundial.

Den ‘Pierre Lauffer : het bewogen leven van een bevlogen dichter ‘Bernadette Heiligers ta mustra con Lauffer a desaroya como persona y con e historia di famia a influencia su bida. Bernadette Heiligers  ta describi e relacion entre Pierre Lauffer y su mama y otro miembronan di famia y tambe con for di chikito el a crece cu un aprecio pa su idioma Papiamento y a siña domina e idioma y tecnica di skirbi. Esaki tabata excepcional den e epoca cu Lauffer tabata mucha y cu tabata considera Papiamento un idioma inferior. Asina mes Lauffer su amor pa Papiamento a sigui crece y e ta expresa esaki pa medio di su creacionnan. Den e  biografia tin fragmentonan di poemanan di Pierre Lauffer y mucho mas informacion y potret.

Un y tur ta bon bini na biblioteca diamars dia 29 di april. Presentacion ta cuminsa 7or.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn