Poesia na Biblioteca

Dialuna, 21 di maart 2016, for di 7’or pa 9.30 di anochi lo tin un programa multidisciplinario dedica na celebracion di Dia Internacional di Poesia na Biblioteca Nacional Aruba, George Madurostraat, Oranjestad.

Biblioteca Nacional Aruba, Instituto Pedagogico Arubano, Departamento di Cultura Aruba y organisado Mirto Laclé ta invita pueblo di Aruba en general, autor- y poetanan pa ta presente pa celebra e dia tan importante aki.

Lo tin presentacion di diferente poeta, declamacion, musica, canto y baile. Como atraccion special lo tin presentacion di un autor di Corsou, Roselyn Jessurun, cu lo duna un show cu poesia ritmico y poesia canta. Tambe Roselyn Jessurun lo presenta su obra literario Pais Ankrá.

Durante programa di Dia Internacional di Poesia 2016 lo duna atencion na sra. Maybelline Arends-Croes cu den e siman ey ta celebra su cumpleaños.

Lo tin presentacion di Grupo Rondalla Universo di Aruba cu 14 guitarista y cantante. Lo tin declamacion di poesia cu e.o. Anaisa Orman y baile di grupo Gucci-dancers di grupo di teatro di Departamento di Cultura Aruba. Tambe lo tin presentacion di coro di canto bou guia di Maybelline Arends-Croes.

E autor Roselyn Jessurun a nace na Corsou caminda e ta biba y traha como Register Accountant. El a studia Economische Wetenschappen I, II en Recht y a doctora den estudio di Economia Empresarial na Hulanda. Roselyn ta autor, productor, compositor, declamado. E ta trece mensahe mediante poesia y musica. E ta toca guitara, piano, conga y bongo y e mes ta compaña su poemanan di forma ritmico. Roselyn ta amante di cifra, e ta gusta analisa, duna conseho y aporta pa su prohimo. Den tur loke e haci e ta busca perfeccion.

Entrada ta gratis. Pa mas informacion por yama Mirto Lacle na 740 2044.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn