Presentacion di buki “Nos ta Arubiano”

Dr. Oswald R. Wever, den cooperacion cu Instituto Venezolano de Investigaciones (IVIC) y University of Puerto Rico (UPR), a realisa un estudio riba e structura genetico di nos poblacion. E investigador Arubiano a haci un investigacion mtDNA cerca e poblacion Arubiano durante e periodo 2003 te cu 2011. E resultadonan a wordo publica den su buki “Genetic structure of the Aruban population: three origins”. Evaluacion di e obra a wordo haci pa imunologo-medico Profesor Dr. Ashley Duits y a duna mas ainda contenido na e investigacion. Dermatologo John Kock a indica ‘cu e peso di e buki ta refleha medicina basa riba hechos y datos’. ‘ Un acercamento lucido di un topico asina delicado’ esey ta e opinion di patologo Ricardo Gogorza, ‘un bunita combinacion entre sciencia y antropologia cu a trece claridad pa esnan cu ta gusta haci suposicion’.

Nos ta Arubiano: Tres Origen

Den sentido popular testnan di DNA, awe’n dia ta wordo hopi utilisa pa busca rastronan familiar. Organisacionnan policial ta soluciona casonan criminal pa medio di analisis di DNA.

Conclusion di e investigacion: A pesar cu na aña 1924 industria petrolero a trece cambio den e structura genetico di e poblacion Arubiano y no obstante cu esaki a continua masalmente desde añanan 1990, e investigacion medico-scientifico “Genetic structure of the Aruban population: three origens” asina mes a comproba na aña 1911 cincuentitres prociento (53%) di e poblacion Arubiano ainda ta carga e gen-nan Amerindio. Pa medio di e mama e sanger Injan di antaño lo sigui core den vena di e Arubiano di generacion pa generacion. Y esaki ta e balor adicional cu nos pueblo tin como Arubiano.

Pa haya sa mas di e investigacion aki, Archivo Nacional Aruba, den cooperacion cu Fundacion Amigonan di Aruchivo, ta invita bo pa e presentacion di e investigacion di Dr. Oswald R. Wever, conhuntamente cu imunologo-medico Profesor Dr. Ashley Duits. E programa lo ta sumamente interesante y educativo, na unda Dr. Oswald R. Wever lo duna un amplio splicacion di su estudionan, specialmente dirigi riba nos poblacion di Aruba, mientras Profesor Dr. Ashley Duits, lo duna un splicacion di estudio mtDNA cual ta mas general (mundo) pa amplia nos conocemento den e materia aki. E mainta informativo aki, cu ta tuma lugar diasabra 28 di juni proximo di 10.00 a.m. – 12.00 p.m. na Archivo Nacional Aruba. Entrada ta gratis y por registra na tel: 582-1938 of email: ninafita@gmail.com. Tur persona ta bon bini! E buki unico aki lo ta na benta durante e presentacion pa Awg. 35,- pa uno.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn