Presentacion di buki di Ronny Lobo

Biblioteca Nacional Aruba conhuntamente cu Editorial Charuba ta organisa un presentacion di buki di un autor di nos isla ruman, Corsou. Sr. Ronny Lobo a publica e novela ‘Bouwen op drijfzand’ y ta presenta esaki na Restaurant La Trattoria Faro Blanco (California Lighthouse) diasabra anochi den un ambiente special. E presentacion ta cuminsa 7or y ta te 9 or.

‘Bouwen op drijfzand’ ta e prome novela di Ronny Lobo. E autor, mescos cu e caracter principal den e buki, ta un arkitecto. E autor ta logra un composicion den su storia cu ta uni su amor pa arkitectura y e cultura Caribense cu hopi otro aspecto interesante di relacionnan humano y un complexidad di diferente motibo ta duna e storia un tension y suspenso.

E autor, kende na 1992 a ricibi e premio Cola Debrot pa su trabou como arkitecto, ta considera arkitectura  un arte y ta purba cada biaha, tanto den su trabou den arkitectura como den su creatividad di escritor, pa bay bek na origen di tur cos pa asina haya mas conocemento y inspiracion. Pa Bouwen op Drijfzand, Ronny Lobo a haya inspiracion di diferente autor y buki pero muy en especial e autor  defunto Erich Zielinski, autor di e.o.  ‘De Engelenbron’ y tambe Frank Martinus Arion,  escritor di entre otro e novela ‘Dubbelspel’.

E cas editorial cu a publica e buki aki ta ‘In de Knipscheer’ cu ta un cas editorial na Hulanda, hopi conoci pa su publicacionnan di autornan di region Caribense.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn