Presentacion di buki Topa TULA

Biblioteca Nacional Aruba a ricibi un ehemplar di e buki Topa TULA. E presentacion a tuma luga na maart. Olga Orman hunto cu Giselle Ecury a percura pa e produccion di e buki Topa TULA, trahando cu Stichting Simia Literario na Hulanda. Den e buki Topa TULA, produci pa Stichting Simia Literario tin contribucion di varios autor y poeta conoci di Aruba y Corsou.

Stichting Simia Literario a lansa un proyecto special y a pidi diferente poeta pa construi un encuentro literario entre Tula y e generacion di awor. Esaki basa riba inspiracion di e storia di Tula. Asina den poemanan cortico tin un combersacion andando entre Tula y e generacion di awor tocante temanan manera libertad y igualdad. Poesia ta e expresion di emocion den palabra. Poesia ta manera musica sin sonido. E tin un tradicion largo den cultura Antiyano cu ta bay bek den tempo di Banderitanan, poemanan cortico y skerpi cu tabata vocifera e comentario social di e tempo aya. Asina por lesa riba e portada.

Cu atencion pa loke e poetanan kier a expresa y den e forma di nan escohencia, sin toca e nificacion autentico y sentimentonan, Giselle Ecury hunto cu Olga Orman a percura pa e traduccion di Topa Tula. Esaki bou di e lema “E autor/poeta semper tin e ultimo palabra”. Poetanan cu a contribui na Topa Tula nan ta: Laurindo Andrea, Hilli Arduin,Frida Domacassé, Giselle Ecury, Eugènie Herlaar, Alida Kock, Gerarda Lauf, Joan Leslie, Charlton Marcos, T. Martinus, Gabriel Mitchell Murray, Quito Nicolaas, Olga Orman, Walter Palm, Libèrta Rosario y Wendela de Vries.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn