Presentacion di buki y revista na Biblioteca

Diahuebs 13 di november di 7or y mey pa 9or y mey di anochi ta tuma lugar na Biblioteca Nacional Aruba, na Oranjestad, un presentacion di varios buki y revista. Den cuadro di su meta pa stimula lesamento bou di nos poblacion Biblioteca Nacional Aruba regularmente ta tene presentacion di buki nobo cu ta sali riba mercado.

A keda traduci na Papiamento un guia pa mayornan riba e topico di educacion tocante droga, edita pa Fundacion Elsa Coffi. E titula ta Seguridad prome’, Adolescente y droga for di un perspectiva basa riba realidad. E ta un buki util tambe pa maestro y maestranan di scol. Nos conoce un guia tocante educacion sexual, pero no ta existi ainda un guia na Papiamento con pa educa mucha y hoben tocante droga. Ta un buki di Dr. Marsha Rosenbaum, un experto internacional riba e tereno aki. Traduccion ta di Dr. Armando Lampe. E buki aki ta na benta e anochi aki pa solamente 10 florin.

Otro publicacion na Papiamento, cu lo keda presenta e anochi aki, ta un revista nobo digital cu yama ‘Universidad di Pueblo’. Ta un iniciativa di Melvin Quilotte y ta skirbi pa profesionalnan  y lo sali un bes pa luna. No ta existi ainda na Aruba un revista profesional digital. E revista digital aki ta completamente gratis.

A sali riba mercado e ‘Agenda Latinoamericana 2015’ dedica na e topico di Derechonan Humano. Esaki ta un palabra hopi uza, pero hopi no conoce e rikesa di e concepto aki. Lo tin dos autor di e Agenda  cu lo duna un splicacion e anochi aki. Por cumpra e agenda e anochi aki so y e cantidad ta limita. Percura pa ta na tempo, e ta hopi util pa skirbi bo compromisonan den e aña nobo 2015.

Finalmente lo keda presenta e prome buki digital di Armando Lampe tocante e bida di un sacerdote catolico cu na mesun momento tabata politico na Hulanda, esta Herman Verbeek kende a fayece na 2013. E eBook titula ‘Een leven dat te denken geeft’ ta disponibel via www.bruna.nl for di 10 di november y e autor lo splica e anochi aki tocante e contenido y pakico e a publica un buki asina.

Lo ta un anochi hopi informativo y educativo y ademas hopi varia den topiconan di interes.Despues por keda conbersa den un ambiente ameno na nos Biblioteca Nacional Aruba. E presentacion ta cuminsa 7or y mey.  





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn