Presentacion di Coro hubenil Tutti Frutti na biblioteca

Coro hubenil Tutti Frutti lo tene un presentacion special na biblioteca dialuna awor 23 di juni, cuminsando for di 5or di atardi. Ta custumber di e dirigente sra. Maybeline Arends-Croes y su coro pa cera e aña escolar di e coro cu un presentacion pa e mayornan of ta bay canta pa un of otro instancia. Aña pasa e coro a canta na San Pedro Paviljoen. E aña aki nan ta desea di hacie na Biblioteca Nacional Aruba. Pues, e no ta un concierto, pero simpel un atardi musical pa mayornan, rumannan, famia, amigonan bin scucha con y kico e muchanan ta canta den coro. E muchanan di coro Tutti frutti ta practica durante aña escolar tur dialuna di 5'or pa 6or y mey. Lesnan ta gratis.

Sra. Maybeline Arends-Croes a cuminsa cu e coro hubenil Coro Tutti Frutti na aña 1969. E ta comenta cu “Awor mi ta hasta hayando yiunan di mi ex- cantantenan ta bin canta cu mi den Tutti Frutti.” “E coro ta canta na misa, na actividadnan cultural, y ocasionnan special cu nan invita nos, tambe na Cas di Cultura, Convention Center, hotelnan, Centro di Bario,  pa instancianan caritativo y diferente organisacion. E edad ta varia di 8 aña te  ora nan bay studia den exterior of sigui cu estudio avansa. Tin dos di mi alumnonan cu tin 16 aña caba ta canta cu mi, esta Hilyann Croes ( ta bayendo USA awor pa bay sigui studia) y Veloushka Krozendijk, kende ta bayendo IPA. Mandy Villasmil tin como 15 aña ta canta cu mi. Awor e ta bayendo Hulanda pa bay sigui studia medicina. E ta canta bunita y ta toca ademas piano, fio y accordeon. Nos coro ta canta canticanan di nos folklore, tambe canticanan cu bon mensahe y canticanan pa misa. Nos ta canta tambe na Ingles, Spaño y Hulandes , pero mayoria ta na Papiamento. Seis miembro di Coro Tutti Frutti a fungi como e coro di Voz-i-landia pa acompaña tur e participantenan cu mester di coro. Tanto e aña aki, como aña pasa. Cada bes ta rond di 50 cantica nobo pa nan siña y compañia. Pa e festivalnan di Voz-i-landia den pasado desde 1981 tambe mi tawata scohe mi bon cantantenan di Coro Tutti Frutti pa fungi como coro pa Voz-i-landia.”

Un y tur ta bon bini na biblioteca dialuna atardi pa disfruta un rato di e presentacion di coro Tutti frutti.

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn