Presentacion pelicula di ‘Poetry is an Island’ , Derek Walcott, na Tele-Aruba

Diabierna anochi, 31 di maart 2017, despues di sorteo di Loto pa Deporte, pa 9.10 di anochi Tele-Aruba canal 13 y 23 lo presenta e documentario/película ‘Poetry is an Island’ , Derek Walcott.

Un documentario unico di e poeta y dramaturgo caribeño y Premio Nobel di Literatura 1992, Derek Walcott, titula Poetry Is an Island, produci pa Ida Does y Rebecca Roos. Astrid Britten, directora Biblioteca Nacional Aruba, Mirto Laclé, gestor cultural y Tele-Aruba ta gradici Ida Does y Rebecca Roos pa nan contribucion cu ta haci posibel e transmision di e documentario/película Poetry is an Island.

E Comision di Premio Nobel di Literatura ta describi e obra literario di Derek Walcott como un obra poetico di gran balor, sostene pa un vision historico, e resultado di un compromiso multicultural. E documentario ta presenta aspectonan intimo di bida di Derek Walcott y ta situa na su isla natal Sint Lucia. Ora Derek Walcott ta na paisnan lehano su antoho ta pa regresa su isla.

Kico ta inspira e gran poeta aki? Kendenan ta e personanan cu nan bida a keda converti den poesia pa medio di e obranan di Derek Walcott? Y con nan ta experiencia e dote di idioma di nan amigo, nan mentor y nan tata?

E documentario ta explora e obra literario di Derek Walcott, e paisahenan y e personanan cu ta inspira Derek Walcott. Tambe e documentario ta mustra e sitionan esencial di e trabou y bida di Derek Walcott. Algun di su amigonan cercano di infancia ta versa nan opinion encuanto Derek Walcott.

Riba potret: Derek Walcott ta firma e obra Omeros pa Olga Orman, autor Arubano, na mei 2008, Amsterdam, Hulanda.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn