Proteccion di Bubinan den area di refineria

Biblioteca Nacional Aruba y Santa Rosa ta organisa un charla informativo tocante 'Proteccion di Bubinan den area di refineria'. Esaki ta tuma lugar na biblioteca San Nicolas, dia 29 di januari pa 6or y mey (1 ora). Facilitator ta Sr. Facundo Franken y entrada ta gratis.

Diahuebs awor dia 29 di januari for di 6:30 te cu 7:30 di anochi, ing. Facundo Franken di e “seccion di mantencion di naturalesa” di Departamento di Agricultura, Cria y Pesca, ta presenta un charla riba e topico di “parhanan di lama den e area di refinaderia”. E ta amplia riba e sorto di Bubinan cu sa pone webo riba e rifnan di San Nicolas, nan contexto historico y forma con nos por mantene esakinan.

E charla aki ta interesante pa e habitantenan di Colony y San Nicolas kende por hunga un papel importante den e sobrevivencia y proteccion di e parhanan aki. Tambe durante e anochi aki lo amplia riba e plannan pa 2015 manera limpiesa di rifnan y un workshop special riba e topico di Bubinan na Aruba.

Desde anja 1984 despues cu DLVV a cuminsa asisti den e observacion di e Bubinan rond di nos isla e interes y conocemento di e conservacion y comportacion di e parhanan aki a bin ta crece  unda cu na aña 2000 te cu aña 2011 DLVV tabata envolvi den e Aruba Tern Project por medio di ing. Facundo Franken unda cu a haci estudio riba e colonia di Bubi den e waf di Oranjestad, a pone palapanan na Malmok, borchinan riba rif di San Nicolas, a haci peticion pa haya rapportnan di Aruba Tern Project y a continua cu vigilancia riba e rifnan.

Durante e añanan tambe DLVV a elabora reportahenan pa noticia y television y a organisa un presentacion pa AHATA environmental committee na aña 2003 como tambe a organisa un reunion cu refineria Valero Aruba cu e Aruba Term Project na 2005, a elabora un aviso informativo pa informa usuarionan di lama di colony di Bubinan y sugeri na mas pa participa den e clean up di e rifnan cu Valero Volunteers pa aña 2006, 2008, y 2010.

Despues di e Aruba Term Project, DLVV a sigui conta neishi, puyito y webo di e Bubinan, unda cu den juni 2012 y 2013 DLVV tabata topa cu puyitonan di e Meuchi Bacho Preto cu ya tabata bula y puyitonan di Bubi Chikito na e momentonan ey apenas tabata tin dos siman bieu.

Segun e mesun dato di ATP e Roseate Tern, Meuchi, ya no ta broei mas ariba e rifnan di San Nicolas. Desde aña 1892 caba e sorto aki ta conoci cu e ta pone na Aruba, sinembargo ora cu e maneho di e refineria a cambia nan a stop di pone ariba un di e piernan. Apesar di esaki DLVV a yega di mira nan pone ariba baranca pariba di Bachelor’s Beach. Na 2005 DLVV a mira puyitonan morto ariba e rif dilanti Savaneta despues di Siman Santo. Probablemente e mayornan a bandona nan debi na presencia di hende. Bubinan ta hopi vulnerabel pa disturbio durante formamento di pareha, inicio di pone webo y broei e webonan. Te asina cu hopi webo por bay perdi of e mayornan ta bandona nan cria. Aserca ta bin cu nan ta parhanan cu ta pone solamente un periodo. Si nan tin cu bolbe pone e posibilidad ta grandi cu e cria no ta fuerte suficiente den Augustus pa bula cu e mayornan bay bek pa lama di Brasil, unda cu nan ta biba e resto di aña.
 

Na 2008 Birdlife International a categorisa e rifnan di San Nicolas y Oranjestad como areanan importante pa parha (Important Bird Area). Di e Meuchi Bachi Preto, un porcentahe mundial significante ta broei na San Nicolas. Entre e otro 10 sortonan di Bubi tin e Bridled y e Common Terns, di cuanan populacion regional di importancia ta broei na San Nicolas y e Black Noddy di cua e rifnan lo ta un di e dos lugarnan di henter Caribe cu nan ta frecuenta. Na 2011 Birds Caribbean a categorisa e rifnan di San Nicolas, na di dos lugar di e areanan importante di colonia di Bubi cu a resta den Caribe. Sinembargo sin proteccion legal pa e sorto y of pa e areanan esakinan lo keda perde tereno na Aruba.

Ing. Facundo Franken di DLVV, a gana e Herz International Seabirf Fellowship debi cu entre otro e tin un Bachelor of Science den Agricultura tropic y specialisa den produccion animal. E fellowship tabata destina pa hendenan cu ta traha den conservacion di naturalesa, sea den gobierno of instancianan particular. Na aña 2012 ing. Franken, ariba invitacion di e Society for the Conservation and Study of Caribbean birds, a atende e international workshop di Build Capacity for Seabird Conservation in the Wider Caribbean and the Gulf of Mexico na e Gerace Research Centra San Salvador, Bahamas.

Departamento di Agricultura, Cria y Pesca ta extende un invitacion na pueblo completo specialmente habitantenan di Colony y San Nicolas pa attende e charla aki diahuebs  29 di january for di 6:30 pa 7:30 na Biblioteca San Nicolas y asina siña mas di e parhanan aki.

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn