Proyecto pa mehoracion di bario “Rancho

Studiantenan di Hogeschool di Rotterdam lo hasi un parti di  nan estudio na Aruba

Na aña 2009 Museo Arqueologico a habri su porta pa publico cu e exposicion “Rancho, Nos Museo, Nos Bario, Tira un bista”. Un exposicion sumamente exitoso tocante e vecindario unda Museo a ubica. E exposicion aki a conta e historia di “Rancho” y su personahenan, como tambe a mustra riba e architectura unico di e bario. E exposicion aki a yena hopi hende di e bario cu orguyo, apesar di e problematicanan social cu e bario ta lucha cu ne. Pa Museo Arqueologico e exito di e exposicion a refleha ora cu bisiñanan mes a lanta un fundacion pa mehoracion di Rancho y awendia Museo Arqueologico tin un relacion estrecho cu “Stichting Rancho”.
Museo Arqueologico ta hopi contento cu, hunto cu Hogeschool Rotterdam, Infrateam, Monumentenfonds, Stichting Rancho, Ministerio di Infrastuctura, Ministerio di Educacion y Ministerio di Cultura, por forma parti di un proyecto sumamente importante pa mehoracion di nos bario.
Studiantenan di Hogeschool Rotterdam lo haci un ‘Minor’ den ‘Sustainable building Aruba 2013’ cual nan lo haci di y den e bario Rancho. Di dia 25 di November te cu dia 8 di December un grupo di 18 studiante lo keda den e bario, lo studia e bario y traha riba nan proyecto den auditorium di Museo. Ademas Museo ta pone un espacio na nan disposicion pa desayuna y lunch tur dia asina kedando den e bario.
Diabierna mainta a tuma lugar na Museo Arqueologico un conferencia pa lanza e proyecto aki. Sr. Rafy Kock y sr. Glen Goddijn ambos di Infrateam a splica cu e proyecto ta den cuadro di e maneho di Gobierno pa mehora barionan na Aruba. A duna como ehemepelnan Pos Chikito y Madiki. Rancho tin hopi monumento y ta cerca di e pasada turistico, pues ta hopi atractivo pa incorpora e aspectonan aki den e tarea pa e studiantenan. Sra. Zetsia Ponson di Stichting Rancho a enfatisa e importancia di partnernan cu ta traha hunto pa mehora e calidad di bida di ciudadanonan di e bario. Sra. Mircla Navas di Fondo di Monumento a splica con e Fondo ya a traha algun plan pa e area di Rancho, catalisando e proyecto aki. Tur partner ta conciente di e retonan social cu tin den e proceso pa mehora e bario pero ta convenci cu trahando hunto lo logra esaki.
 
Sra. Suzy Boekhoudt, colaboradora educativo di Museo a splica cu Museo Arqueologico tambe lo contribui activamente na e contenido di e proyecto. Entre otro e studiantenan lo haya un guia den su salanan di exposicion y den e estudio di Rancho e studiantenan mester considera e rol cu Museo por y mester hunga den e comunidad pa actua como un catalyzador den mehoracio di e bario. Un di e preguntanan cu nan mester contesta ta con Museo por aporta na ‘sustainablity’ di Rancho y e area den futuro.




Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn