Richard Dabian

Richard Dabian semper a gusta canto, baile y teatro. Na scol basico caba Richard a cuminsa canta y a tuma diferente rol den teatro na scol. Baile nunca a keda atras y manera un chinchirinchi el a baila den shownan entre 1982 y 1994, tambe Richard a dirigi e Grupo di Baile Alimah Aruba y a representa Aruba na varios ocasion na otro paisnan manera, Merca, Brazil, Corsou, Boneiro y St Maarten. Durante e periodo aki canto a bay un poco den background.

Na 1986 Richard a bolbe den e mundo di canto y el a cuminsa tuma canto na serio formando parti di Coro di Misa di Sta Cruz  pa despues join Melange dirigi pa Maybeline Arends-Croes.

Un par di aña despues na 1995, Richard ta wordo aserca pa interpreta e cantica “Futuro ta di nos”. E cantica despues ta bira e tema musical dedica na e studiantenan cu ta viaja pa continua nan estudio den exterior.

Richard a presenta varios papel den diferente obra teatral na Cas di Cultura manera ‘E bela di Pasco’, ‘E barco a pega’, ‘Magia di Fantacia’ y tambe ‘E amor di Dorita’.

Na 2011 Richard ta cera conoci cu e mundo di lesamento di buki formando parti di e programa Radial na Blizz FM dirigi pa e escritora y ilustrador Arubano Sheila Werleman kende tabatin un programa di mucha radial di tur diadomingo mainta.

Aki ta unda e ta bin den contacto cu Fundacion Bon Nochi Drumi Dushi. Bon nochi drumi dushi ta stimula lesamento cerca muchanan di Aruba. E ta keda fascina cu e meta di organisacion y ta join nan mesora y te cu awe ta miembro boluntario di e fundacion aki.

Despues di casi 5 aña miembro di BNDD e por wak un trayectoria hopi exitoso mirando e tantisimo bunita presentacionan cu tabatin. Richard tin 51 aña di edad. Durante Festival di buki pa mucha 2016 di biblioteca, Richard ta bishita diferente scol rond Aruba pa duna un presentacion special.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn