Robert Reeberg ta deleita nos muchanan cu su storianan

Robert Reeberg ta deleita nos muchanan cu su storianan

E Festival di Buki pa Mucha ta habri diabierna dia 1 di november cu un fiesta dilanti biblioteca y e bishita di autor na scolnan ta tuma lugar den e siman di 4 pa 7 di november 2013. Cada aña e festival tin otro tema. Un grupo di autor, ilustrador y contado di cuenta di buki pa mucha for di Aruba, islanan di Caribe Hulandes, Hulanda y otro pais ta bishita mas o menos 65 di e 68 scolnan riba nos isla. E tema di aña 2013 ta “Deporte y Wega” y e lema ta: ‘Buki buki den wega, pianan na careda’. Esaki ta e di 21 festival cu biblioteca ta organisa pa stimula mucha pa lesa y pa stimula combersacion y interes pa autor di buki pa mucha como tambe ilustrador.

Robert Reeberg a nace na Aruba y pa hopi aña caba e ta maestro di scol. Actualmente e ta traha den enseñansa special na su dushi Scol Caiquetio. E tin varios hobby, manera traha cantica pa mucha, manera e cantica di e Festival di Buki pa Mucha di aña pasa ‘E mundo ta drey’, boso ta corda? E ta toca guitara, e ta traha poesia y e ta skirbi storia.

Hopi aña caba e ta skirbi storia. For di tempo cu e tabata mucha e tabatin un creatividad enorme. Su prome creacion tabata un poesia na edad di diesdos aña.

El a skirbi hopi storia cortico pa su scol, unda nan ta duna les na Papiamento so. Su prome obra riba mercado tabata un traduccion liber di e cuenta di pueblo Aleman, titula ‘Shete den un solo tiro’ algun aña atras. Mas tanto pa mucha e ta skirbi, aunke e tambe tin obranan pa adulto, manera e coleccionnan di poesia ‘Blo sunu y Man teni’. Otro obranan cu Robert tin riba mercado ta’Tur pa mi, Cant’i lama’, ‘E anochi cu Sinterklaas a topa cu Santa Claus’, ‘Capa Blou y E hobby di Rino’, ‘E mago di Sero Teishi y Cindy Rella’.

Robert kier stimula tur mucha pa lesa, pasobra banda di e hecho cu ta masha dushi pa bo drenta den e fanatasia di e storia, bo ta siña di dje y lo bo bay dilanti den bida.

Den siman di 1 pa 8 di November e grupo di escritor y contado di cuenta lo bishita 65 scol cu presentacionnan atractivo y diverso. Pa muchanan cu no ta haya un bishita di autor na scol tin un programa di actividad na biblioteca merdia, tanto na Playa como na biblioteca San Nicolas. Tur mucha ta invita pa e fiesta di apertura diabierna dia prome di november dilanti biblioteca pa 5 or di atardi. Tur actividad ta gratis.

Ban tur coy un buki y ban cuminsa lesa!

 

 

 

 

 

 

 

 

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn