Rudy Croes a lansa su buki ‘E hombr’i pueblo'

Diaranson ultimo na bispo di Dia di Betico, ex-minister di Husticia, Rudy Croes a presenta su prome buki ‘E Homber’i Pueblo’ na Biblioteca Nacional Aruba (BNA) su sede principal na Playa.

E acto aki a conta cu presencia di prome minister, sra. Evelyn Wever-Croes y ministernan sr. Otmar Oduber, sr. Andin Bikker y sr. Rudy Lampe. Ademas algun parlamentario y invitadonan special.

E linguista di Papiamento, sr. Mirto Lacle kende a fungi como MC a refleha entre otro riba e contenido di e buki titular ‘E Homber’i Pueblo’. E titulo aki ta e nomber di cariño cu e autor sr. Rudy Croes a haya tempo cu el a drenta arena politico.

Despues cu sr. Rudy Croes a sigui cursonan intenso di nos lenga materno Papiamento, el a dicidi pa skirbi un buki. Cu ayudo di su docentenan y otro personanan, ex minister Rudy Croes a presenta su buki ‘E hombr’i Pueblo’, na biblioteca diaranson ultimo.

E buki aki tin 3 tema. Den e prome parti titula ‘Respet pa e berdad’, e autor ta presenta su vision di e lucha politico di su ruman Betico Croes. E ta referi na historia, ideologia y obstaculonan cu Betico a pasa aden pa logra su causa prome cu Status Aparte. E di dos parti ta dedica na ‘Grupo di Betico’ cu e aña aki ta celebra 50 aña di existencia. Den e di tres parti ‘For di mi cuna te na mi tumba’, e autor, Rudy Croes, ta referi na e tragedia nacional relaciona cu e desaparicion di Natalee Holloway. Croes ta menciona algun asuntonan cu el a pasa aden riba diferente persona relaciona cu e caso aki, tempo cu e tabata minister di Husticia. Por lesa mas den edicion di Bon Dia di diasabra 27 di januari 2018. Y por consulta e buki na Dept. Arubiana. Grupo di Betico a duna un bunita presentacion musical na publico presente.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn