Scol, maestro y maestra na Aruba den Siglo 19 y Siglo 20

Den su charla drs. Donk lo trata den liñanan grandi historia, nificacion y importancia di enseñansa na Aruba. Tambe e lo trece padilanti con a consecuencia di enseñansa mobilidad social di diferente grupo marginalisa (mucha homber y mucha muhe di e clasenan social abou y di e gruponan minoritario) ta desaroya di abou bay ariba. Importancia di maestro di scol den politica y den cultura a hunga un papel esencial den e proceso ey.  Cua tabata e factornan cu tabata stimula of obstaculisa e mobilidad social ey den su desaroyo di abou bay ariba den contexto di e desaroyonan social contemporaneo? Por ehempel, con ta posibel cu maestro manera Felepito Tromp, Betico Croes, Faustina Frank etc. despues di nan estudio a subi riba e trapi social y tanto maestro di scol basico como docente di scol secundario a bay pertenece na e elite cultural di nos isla? Drs. Ronald Donk lo tene su charla na Hulandes.

Seccion Arubiana/Caribiana di Biblioteca Nacional Aruba ta invita maestronan, docentenan, personanan trahando den enseñansa y publico en general pa bin scucha e charla interesante aki di drs. Ronald Donk. E charla ta tuma luga na seccion Arubiana/Caribiana den su edificio na Bachstraat 5 na Playa, diahuebs 20 di november pa 8:00 or di anochi (E sala lo ta habri for di 7 or y mey). Bin conoce un poco mas di historia di Aruba, en especial historia di enseñansa na Aruba.

Ronald Donk (Aruba 1945) a crece den un famia Surnameño den e barionan multicultural di Essoville y Lago Heights na San Nicolas. Durante su infancia y hubentud el a bay scol na Playa y na San Nicolas y el a ricibi su MULO-diploma na John Wesleycollege na aña 1962. Despues di esey el a studia na Nijmegen, Hulanda: prome el a sigui su estudio di maestro (onderwijzer) na Kweekschool y djey el a haci estudio di tanto MO-B como doctoraal den Historia. Entre 1967 y 1980 e tabata maestro di enseñansa basico y docente den enseñansa secundario na Aruba (Colegio Arubano/Lerarenopleiding) y na Hulanda. Di 1980 pa 2007 el a fungi como docente principal (hoofddocent) na Scol Superior (Hogeschool) Windesheim na Zwolle na e Curso pa Docente di Historia den Enseñansa Secundario. El a colabora den varios publicacion den forma di buki tocante e gruponan di migrante na Hulanda y den diferente estudio di historia di Antia y di Aruba. Ademas el a skirbi buki di estudio di historia pa alumno Hulandes y Antiano. Ultimo tempo e ta profundisa su mes den historia di enseñansa na Aruba y na Corsou. 

Charla:  door di drs. Ronald Donk

Topico: Scol, maestro y maestra na Aruba den Siglo 19 y Siglo 20

Fecha: diahuebs, dia 20 di november 2014

Ora: 20:00 or (sala ta habri for di 19:30 or)

Luga: Arubiana/Caribiana na Bachstraat 5, Oranjestad (tel.: 582-6924)





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn