Spirito di cabrito

Biblioteca Nacional Aruba ta presenta un exposicion di sr. Jose Garcia di obhetonan di klei hopi special. Esakinan ta riba display pa publico di dialuna dia 25 di mei te cu dia 29 di mei durante orario di biblioteca na G. Madurostraat. 
Esaki ta un exposicion di un coleccion di obheto cu a keda presenta den cuadro di e celebracion pa ‘Dia nacional di bandera di Haiti’ cu a tuma lugar na biblioteca dialuna ultimo. E obhetonan ta traha di klei di Aruba y sr. Garcia a haya su inspiracion pa traha nan for di e pinturanan di indjan (Rock paintings). E ta traha cu diferente simbolo cu tin un nificacion special pa sr. Garcia, manera por ehempel un circulo di bida y figuranan indigeno. E exposicion ta carga e titulo ‘Spirito di cabrito’ : un expresion cu Klei di Arubeira’. Un di e obhetonan ta e skelet di un cabrito cu sr. Garcia a haya cobando den tera pa haya e klei special.
Sr. Garcia tin poco preocupacion pa nos naturalesa y medio ambiente cu a sufri hopi daño y pa medio di su arte e ta purba conecta cu e tera puro y e mundo spirital. Pero tambe e ta honra Aruba su pasado y pueblo indigino cu su obhetonan traha di klei ‘Arubeira’ cu ainda tin DNA den dje di Aruba su antepasadonan. E klei aki sr. Garcia a haya na Santa Rosa y Butucu y Ayo cu ta un klei special, poco flexibel manera plastic cu ta bon pa forma y traha cu ne. Y e ta seca basta bon sin sker. Pero si e sker mes, ta adapta e idea original y ta traha cu e resultado cu e sker a trece aden dor di, por ehempel, highlight e sker cu un color di oro. Asina e negativo ta bira positivo. Sr. Garcia ta laga e klei papia pa su mes y ta duna e material natural aki e oportunidad pa bisa locual cu e kier y e ta descubri diferente forma y mensahe durante e proceso. E simbolonan cu por wak riba e obhetonan ta representa un coneccion cu e mundo spiritual. Sr. Garcia a haya ayudo di artista Ciro Abath pa caba e proceso den forno di Abath su studio. 
Respeta mama tera, conecta cu e naturalesa, y cuida parha y bestia pa trece mas ‘awareness’ pa nos por wak cos di diferente perspectiva y balora bida mas y otro como ser humano y amigo, esakinan ta algun di e balornan cu ta pasa den mente di e artista ora cu e ta traha su obranan. 
E exposicion ta habri di dialuna awor te cu diabierna y ta habri pa un y tur.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn