Storianan di Dooi

Tur pueblo, incluyendo Aruba, conoce su contadonan di cuenta, hendenan cu na un forma fenomenal ta pone otro hende pensa, gosa y hari. Nan ta domina nan idioma bon, ta bon conoci cu cultura di nan pueblo, cu custumbernan y cu expresionnan y palabranan poco uza awendia.  Nan cuentanan of storianan por ta serio, chistoso, surrealistico of yena cu fantasia pero ta duna bista di e ambiente den cual nan ta of tawata biba. E cuentanan ta bisa algo di e alma di un pueblo.

Un di e personanan aki ta Theodor Dañe, conoci como Pachi Dooi y cu nobenticinco aña pasa a nace den districto di Santa Cruz. Pachi Dooi tawata un persona cu tawata gusta conta di pasado y cu tawata corda hopi cuenta di antes. Lamentablemente den luna di April di e aña aki Pachi Dooi a fayece, pero no sin laga atras un teroso den forma di storianan cu e tabata conta cu masha fervor. Na edad halto Pachi Dooi a dicidi di pone su storianan riba papel y a yena schriftnan completo. Lucia Kelly cu ta haci historia oral, a yuda cu e publicacion.
 

UNOCA a tuma nota di e storianan y a reconoce nan importancia. Ta importante pa colecciona y conserva esakinan pa futuro generacionnan, mirando cu nan ta bisa algo di nos cultura y identidad. UNOCA awor tin e placer pa informa publico di e prome publicacion di e serie “Storianan di Dooi”. Pachi Dooi y su casa Colati a logra wak e prome buki aki y nan a keda hopi contento pero lamentablemente pa motibo di malesa y fayecimento no por a presenta e buki oficialmente na publico nan mes.

Na nomber di e yiunan, UNOCA ta informa cu e buki aki awor ta na benta na oficina di UNOCA situa na Stadionweg 21. Tambe por yama Lucia Kelly na tel. 5874759. UNOCA lo haci donacion di e buki na Biblioteca Nacional Aruba (BNA), Departamento di Cultura y Archivo Nacional Aruba (ANA). E buki ta obtenibel tambe den boekhandel rond di nos isla.

UNOCA y Famia di Pachi Dooi ta spera y ta aprecia si esnan cu lo haya of cumpra e buki, lo sa di duna balor na un talento cu no t’ey cu nos mas. Pachi Dooi a hinca hopi energia y tempo pa skirbi su storianan di antes. Pa mas informacion por yama oficina di UNOCA na 583 5681 of bishita e pagina di UNOCA ARUBA riba facebook.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn