Strategia di enseñansa di Caboverdiano den un contexto di variante y di variedad dialectal

Den cuadro di un conferencia internacional di idioma cu ta tuma luga na Aruba di 5 pa 8 di augustus, IPA y su Centro di Investigacion y Desaroyo di Enseñansa (CIDE) ta organisa un charla comunitario cu e titulo: Strategia di enseñansa di Caboverdiano den un contexto di variante y di variedad dialectal


Den e charla, Profesor dr. Manuel Veiga, lo trata e situacion linguistico na Cabo Verde, dunando un bista di e proceso di desaroyo di e lenga crioyo aki desde su nacemento te awendia, como tambe su desafionan pa futuro.
Basa riba dr. Veiga su experiencia como docente cu e estudio di Master di Caboverdiano na Universidad di Cabo Verde, lo bay enfoca riba cierto strategia cu e maestronan por aplica den scol pa enseñansa di idioma materno na nan alumnonan, specialmente den un contexto caminda tin variante y variedad dialectal.
Dr Manuel Veiga a ricibi su PhD na e Universidad di Aix-en-Provence na Francia y ta profesor den linguistica na Universidad di Cabo Verde (Uni-CV). Dr. Veiga a desaroya y ofrece diferente modulo na nivel academico y a publica diferente buki y articulo den area di linguistica teoretico, descriptivo y Crioyistica. Dr. Veiga ta haci investigacion continuo den cuadro di e lenga crioyo Caboverdiano, cu tin hopi parecido cu Papiamento.
Dr. Veiga ta dedica su mes na promove e lenga aki tanto na nivel nacional, como internacionalmente. Pa logra cu e papiadonan di Caboverdiano ta aprecia nan lenga, dr. Veiga a propone e.o. un alfabet unifica di e lenga y a publica un diccionario.  Dr. Veiga ta un personahe masha respeta den area cultural y politico Caboverdiano y a eherce e funcion di entre otro  Minister di Cultura di 2004 pa 2010. Actualmente dr. Veiga ta profesor y director di e “Master of Creole and Cape Verdean Language” na Universidad di Cabo Verde (Uni-CV).

 

Manera ta custumber, e charla comunitario di IPA ta pa comunidad henter y ta ofrece oportunidad amplio pa haci pregunta, hiba discusion y trece sugerencia padilanti.
Fecha: Dialuna, 4 di augustus 2014
Luga: Biblioteca Nacional Aruba (George Maduro Straat 13)
Ora: 7.30 pm – 9.00 pm
Idioma: Caboverdiano y Papiamento
Entrada: Gratis

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn