Tanto Cuenta

E cuentanan di hada dramatisa pa e elenco di Bon nochi Drumi Dushi, a hiba e publico durante nan recorido bishitando varios bario na Aruba, den un ambiente totalmente hechisa.

Tanto Cuenta su elenco ta consisti di voluntarionan di Fundacion Bon Nochi Drumi Dushi, cu conhuntamente a traha na un programa special, cu ta encera contamento di storia na Papiamento pa e muchanan di Aruba den nan bario. E efecto adicional y special cu e aficcionadonan, den lanta interes den lesamento cerca nos muchanan, a pone na e storianan ta cu nan ta dramatisa e cuentanan durante nan presentacion.

Fundacion Bon Nochi Drumi Dushi no solamente ta haci bishita di lesamento na cas, pero pa varios aña caba ta organisa otro tipo di actividad rond di su enfoke principal cu ta lanta interes di e mucha pa lesamento. Tanto Cuenta a bin pa rebiba e interes cu nos comunidad tin den storianan di cuenta di ada, cu ultimamente a wordo reemplasa pa storianan mas tanto di ficcion den tercer dimension. 

e prome presentacion di Tanto Cuenta a tuma luga den bario di Playa Pabou, unda cu e artistanan a hiba nan publico den un mundo di fantasia, envolviendo nan den e aventuranan di e Pushi cu Boots, y Capa Cora. Siguientemente e bario di San Nicolas a haya bishita di Tanto Cuenta y ultimamente Santa Cruz a yega na turno pa haya nan bisita.

Mirando e cantidad di peticion pa ripiti e presentacionnan, e elenco di Tanto Cuenta lo tene dos anochi di magia na mei proximo na Cas di Cultura. Durante e anochinan aki e artistanan lo presenta storianan nobo y tur esaki den e esfera magico di cuentanan di ada. Esaki lo duna e publico amante di cuenta di ada oportunidad di bin presencia e voluntarionan di Fundacion Bon Nochi Drumi Dushi cu fuera di por conta un storia interesante prome cu e mucha bay drumi, por demostra kico mas bo por haci cu un storia pa lanta interes di e chikitinnan den buki.

Un di e artistanan cu ta forma parti di e elenco ta Richard Damian. Richard semper tabata un persona cu gusta tur loke ta farandula. Richard ta lesado boluntario y ta un di e pilarnan di Tanto Cuenta. Richard su rol principal den e pushi bisti cu boots a hacie bira un di e favoritonan pa nos muchanan.


Tanto Cuenta lo duna un presentacion dia 14 di mei na Cas di Cultura pa e publico amante di Cuentanan di Hada. No solamente e tres cuentanan lo hiba bo den un esfera totalmente di fantasia y magia, nan lo laga bo gosa di storianan di antes cu personahenan cu a permanence como icono pa mayoria mucha.

Un otro artista cu ta forma parti di e elenco di Tanto Cuenta ta Diana Marchena-Martis. For di principio di existencia di Fundacion Bon Nochi Drumi Dushi, Diana cu tin como profesion maestra di scol, a forma parta di e ekipo di  voluntario. Actualmente Diana ta eherce un funcion na Departamento di Enseñansa, na seccion Desaroyo di Curiculo como miembro di ekipo desaroyado di e metodo di idioma Papiamento pa Enseñansa Special basico.  

Trahando cu y pa mucha, Diana a experiencia kico e balor di storia tin den bida di hende. Storia ta alegra y enrikese bida, di tanto mucha como hende grandi. Contamento di storia den famia ta trece famia hunto y por crea un relacion special fuerte. 
Den Cuenta di Hada, e storia ta transporta bo pa paisnan leu y hinca bo den situacionnan magico cu ta pone bo lubida pa un rato e responsabilidadnan diario di bida.

Diana su cuenta di hada faborito ta E wolf y e 7 cabritonan, pasobra e ta un storia cu tension constante. Te na final ainda tin tension, ora e mama cabrito ta salba su yuchinan for di barica di e wolf na soño. 
Diana su experencia como mucha ta cu e por a identifica su mes hopi bon cu e famia di cabrito aki, pasobra e ta forma parti tambe di un famia grandi cu un solo mayor presente haciendo milager. 
Awendia como adulto e tin un enfoke mas amplio di e storia y e mensahe di su cuenta faborito ta cu peliger ta bin na bo porta disfrasa na diferente manera y cu forsa di union den famia bo por para duro contra nan. Alavez no mester perde speransa maske con malo un situacion por mustra. Hende mester tuma accion pa logra algo, no ta yuda pa sinta yora so. 

Diana gusta e forma aki di presenta e storianan di Hada na Papiamento, pa motibo cu actuando e storia ta haya mas bida y ta laga e publico drenta realmente den e storia. E storia cu kisas e muchanan a wak den pelicula of a lesa den buki ta yega mas cerca di nan y ta un satisfaccion enorme pa e artistanan di e Cuentanan di Hada pa mira e caranan entusiasma di e muchanan cu ta convivi cu e personahenan di e storia.

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn