Tayer di teatro pa elenco di Tanto Cuenta

E proyecto "Tanto Cuenta" a conoce un exito cu su presentacion den barionan unda a hasi cuentanan di hada biba den actuacion di elenco di boluntario. E tanda aki a culmina den un presentacion na Cas di Cultura.

Fundacion Bon nochi Drumi Dushi a organisa un tayer intensivo pa e elenco di Tanto cuenta. E tayer tabata bou di guia di e instructura profesional y internacional sra. Olga van Bockhove.

E tayer ta parti di un cantidad di entrenamento cu ta bay tin den futuro, cu e meta di desaroya y engrandece conocemento riba tereno expresivo y comprensivo. Sra. Van Bokhove a concentra mas tanto riba e aspectonan; concentracion, energia, conexion, velocidad diagonal, uzo di espacio, accion-reaccion, blokia y reacciona. Durante tres sesion di 4 ora e elenco di Tanto Cuenta a prepara nan mes pa e siguiente actividadnan cu nan lo presenta den e barionan di Aruba.

Pa e aña 2016-2017 Fundacion Bon Nochi Drumi Dushi a lansa conhuntamente cu varios experto riba tereno social, educativo y teatral un plan integral pa prepara y obtimalisa su directiva y su miembronan riba varios tereno di actividad di lesamento. Pa FBNDD ta importante pa enfoca riba su miembronan boluntario pa asina nan ta bon prepara pa haci un presentacion excelente durante e actividadnan di lesamento y contamento di storia.

Teatro ta conoci pa stimula y lanta autoestima den cada individuo, mescos cu teatro ta duna potencia na creatividad y ta favorece trabou den grupo. E practicanan teatral presenta pa instructor Olga van Bokhove a demostra di ta un excelente forma di desaroya varios habilidad den un individuo. Tanto pa medio di e papel di cada actor como den e diferente circumstancianan y diferente rolnan cu e instructura ta inventa pa e artistanan trece den escena. 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn