Tayer pa maestro di scolnan basico

Comision coordinador di Festival di Buki pa Mucha 2015 (FBM) a realisa un tayer pa maestronan di scol basico. E tayer cu tabatin como obhetivo general pa informa, prepara y contribui cu tur locual FBM 2015 e aña aki ta bay presenta na Biblioteca Nacional Aruba (BNA) for di dialuna 21 te diahuebs 24 di september ultimo.Por acesa e material aki.

Cu dicho programa maestronan a ser convoca  pa participa na e tayer aki cual a resulta uno hopi agradabel, segun e participantenan. E tayer aki a wordo duna pa empleadonan di BNA y Dept. di Eneseñsa, cu ayudo di algun maestro di scol.

Mirando cu e Festival di Buki pa Mucha 2015 su tema ta, Naturalesa, Ciencia y Tecnologia, a purba di trece mas di e tema aki pa e maestronan por prepara nan alumnonan.Di parti di e maestronan tabatin bon comentario tocante e tayer, sigur e parti caminda nan  por a practica cu e programa Lino den e sala di computer di biblioteca. Despues di a termina e tarea, e maestronan por a presenta e resultado di locual nan mes a traha riba computer. Tabata impresionante con lihe nan a capta e programa y traha algo masha bunita di dje.

Den e tayer tambe a presenta e Regalo di Siman di Buki cu a wordo skirbi pa Curt Fortin, un Arubiano hopi conoci y residencia na Hulanda.

Tambe FBM ta organisa durante e periodo aki, un Actividad pa Scol. E comision a probecha den e siman aki pa invita e scolnan participante na e tayer pa e Actividad pa Scol. E biaha aki ta organisa un quiz, cu lo toca tur locual tin di haber cu Biblioteca Nacional Aruba y FBM 2015.

Jean Carlo Espinal di Mente Inteligente ta e presentador di e actividad aki cu lo ta uno cu ademas di  pregunta, tambe lo tin baile, wega, drama y mucho mas. E evento aki ta tuma lugar diasabra 17 y 24 di october di 3 pa 5 or di atardi.

Cu e quiz aki biblioteca kier pone enfasis riba e importancia di ta un miembro for di edad hoben di un biblioteca. Mas bo lesa mas bo sa, mas bo sa sabi bo ta.

Apertura di Festival di Buki pa Mucha 2015, lo ta diabierna 30 di october di 5 pa 8 or di anochi, patras di BNA na George Madurostraat.

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn