Tio Ali cu otro gira pa scol rond Aruba

 Nos ta contento cu por anuncia cu Tio Ali for di Corsou ta forma parti di e grupo di autor, ilustrador y contador di storia cu ta bishita diferente scol otro siman.

Alvin Inecia ta conoci cerca mucha bou di su nomber ‘Tio Ali’, e personahe cu ta entretene mucha cu storia y mucho mas. Muchanan ta wak e como e Tio Ali hopi pret y dibertido. Tio Ali ta usa musica di tambu, rima, cuenta, cantica y poesia ritmico, sonido y movemento pa yega na e mucha.

Tio Ali ta educa mucha di un forma recreativo y dibertido. Por ehempel pa haci un mucha consciente di importancia di limpiesa y higiena Tio Ali ta toca, canta y baila pa por pasa e mensahe. Tio Ali ta traha cu diferente tipo di grupo. Cu adulto pa medio di tayer y training. Tio Ali ta duna training riba diferente tema por ehempel con ta conbibi cu otro den harmonia. Tio Ali ta presenta durante actividad special y sa duna terapia musical na adulto. Tambe e ta traha cu hendenan cu un of otro desabilidad. Tio Ali ta skirbi y conta cuenta, skirbi y declama poesia tanto suave como ritmico, y e ta skirbi y canta cantica pa mucha. Tio Ali a produci 4 CD di cuenta, poesia ritmico y cantica pa mucha.

Biblioteca Nacional Aruba ta ofrece diferente actividad pa mucha otro siman den cuadro di su Festival di buki pa mucha. Muchanan por topa cu autor entre 3or y 4or di dialuna pa diahuebs. Lo tin contamento di storia, musica, canto y baile. Na biblioteca na Playa  tin presentacion di Irene Heim (dialuna), Charlotte Doornhein (Diamars), Gino Vrolijk (Diaranson) y Tio Ali, Tio Gabi y Emerita (Diahuebs).

Na biblioteca San Nicolas tambe tin presentacionnan special di 3or pa 4or. Tio Ali, Tio Gabi y Emerita (Dialuna), Tricia Chamma (Diamars), Indra Hu (Diaranson), Cathleen Giterson (Diahuebs). Tur mucha ta bon bini. Presentacionnan ta completamente gratis.

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn