Tio Ali ta entretene muchanan di scol

Biblioteca Nacional Aruba a invita un bes mas e tan popular Tio Ali di Corsou, pa participa na e festival di buki pa mucha. Tio Ali lo bishita diferente scol den e siman di dia 5 pa dia 9 di November pa duna presentacion.

Tio Ali a bin Aruba varios biaha pa participa na e festival di biblioteca. Bo por yame un ‘bishitante hopi popular’ manera un repeat guest! For di aña 1994 Alvin Inecia ta activo como ‘Tio Ali’. Reconoci y admira pa mayor y docente como e Tio mas creativo, educativo y dibertido den ramo di entretenimento pa mucha.

Tio Ali ta usa musica di tambu, rima, cuenta, cantica y poesia ritmico sonido y movemiento pa yega na e mucha.

Tio Ali ta educa mucha di un forma recreativo/dibertido por ehempel pa hasi e mucha consciente di importancia di limpiesa/higiena. Pues tocando, cantando y bailando Tio Ali ta pasa e mensahe pa e mucha, hoben of mayor. Tio Ali ta traha cu diferente grupo. Esnan mas grandi pa medio di tayer y “training” riba diferente tema por ehempel, con ta conbibi cu otro den harmonia hasiendo uso di su instrumentnan. Pa hende grandi Tio Ali ta presenta durante actividad special y sa duna terapia musical, tambe pa hendenan cu un of otro desabilidad. Tio Ali ta skirbi y conta cuenta, skirbi y declama poesia tanto suave como ritmico, y ta skirbi y canta cantica pa mucha. Tio Ali a produci 4 CD di cuenta, poesia ritmico y cantica pa mucha.

Tio Ali ta bishita diferente scol na Aruba durante festival di buki pa mucha y ta duna presentacion tambe na biblioteca. Tur mucha ta bon bini dialuna dia 5 di November na biblioteca na Playa di 3’or pa 4’or y tambe diabierna dia 9 di November mes un ora.

Tur mucha ta bon bini diabierna na e apertura y desde dialuna dia 4 di November na biblioteca na Playa di 3’or pa 4’or.

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn