Tio Ali ta entretene pa educa!

Na Biblioteca Nacional Aruba un team dinamico ta den pleno organisacion di e di 23 Festival di Buki pa Mucha. Un festival di buki cu participacion di mas cu 50 scol preparatorio, basico y special riba nos isla cu lo ricibi bishita di autor, ilustrador y contador di storia. Biblioteca Nacional Aruba ta organisa e festival aki pa promocion di lesamento y pa involvi mucha activamente den e mundo di buki cu un siman di actividad rond di buki.

E actividadnan ta tuma lugar diferente caminda, tanto na biblioteca como na diferente scol. Tur aña ta scohe un tema central pa e festival y ta presenta un buki como e Regalo di Siman di Buki. Durante e proximo simannan lo informa di tur autor y ilustrador y tur noticia rondo di e Festival di Buki pa Mucha 2015. ‘Ra…ra…ra con por ta? lesa pa bo sa!’ ta e lema di e festival y e tema ta naturalesa, ciencia y tecnologia.

Tio Ali ta sumamente contento y agradecido di por participa un biaha mas den e Festival di buki pa mucha. Muchanan cu a bendicion’e cu hopi cariño, hopi amor y hopi respet. Tio Ali di Corsou ta un personahe bon conoci cerca nos muchanan. Alvin Inecia a lansa e personahe ‘Tio Ali’ 22 aña pasa y ora nan a puntr’e dicon ‘TIO ALI”? El a contesta cu e palabra Tio ta muestra di respet di un mucha pa un mayor. Mescos cu ta e caso cu Tanchi. Pero e motibo principal pa e uso di Tio ta pasobra un Tio ta e persona mas cerca di mama of tata di un mucha. Tio Ali ta sinti’e un berdadero Tio di e muchanan.

Tio Ali ta entretene pa Educa.  E ta haci esaki cu cuenta, rima, ritmo, poesia y cantamento. Esaki combina cu movimento den cua e ta siña mucha, hoben y mayor kico ta norma y balor manera Respet, Amor, Comparti, Persevera, Pasenshi, Confiansa, Ayudo, Duna, Compronde.

Alvin Inecia a dicidi cu lo e laga Tio Ali bay biba den exterior pa un tempo. Despues di 22 aña ta importante pa un artista explora horizontenan nobo y haya otro tipo di inspiracion. Aruba ta un di e paisnan unda Alvin Inecia kier pa Tio Ali biba un tempo. Tio Ali kier duna Biblioteca Nacional di Aruba un danki masha special y tur e colaboraornan cu ta laga Tio Ali sinti su mes semper manera un Rey. Danki tambe na tur e coleganan di Aruba cu a ricibi Tio Ali cu brasa y curason habri.

E apertura di Festival di Buki pa Mucha e aña aki ta tuma lugar diabierna dia 30 di october patras di biblioteca na Playa.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn