Tio Ali

Tio Ali, un hende ku a bira hopi importante den bida di e hendenan mas importante na mundu, ku ta nos muchanan. I e aña aki ta hasi 20 aña ku muchanan tin nan Tio Ali. Si, dia 12 di Mei 2014 a kumpli 20 aña ku Alvin Inecia a lansa e personage Tio Ali. Un lokutor a puntra Alvin den un entrevista ta dikon e tambe ta usa Tio. E tabata haña ku ya tin hopi hende ta usa Tio kaba. E kontesta di Alvin tabata ku e palabra Tio ta un muestra di rèspèt di un mucha pa un mayor. Meskos ku ta e kaso ku Tanchi. Pero e motibu prinsipal pa usa Tio ta pasobra un Tio ta e persona mas serka di mama o tata di un mucha. Kasi e mes tabata tata di e yu ei.
Esei ta hasi Tio un persona di konfiansa pa un mucha. I esei Tio Ali a bira tambe, un persona di konfiansa pa muchanan.
E promé lema di Tio Ali tabata: “Entretenimentu Edukativo i Dibertido pa mucha”.
E lema di awendia ta: “Tio Ali ta Entretené pa Eduká”. I e ta hasi esaki ku Kuenta, Rima, Ritmo, Poesia, i Kantika kombiná ku movement den kua e ta siña muchanan i algun bia e mayor tambe kiko ta Norma i Balor. Ta masha importante pa nos yunan ta na altura di esaki for di chikí. Ta pesei na lugá di pone fiesta Tio Ali a pone Un Siman di Balor. Un siman pa tur hende pone atenshon na balornan manera, Rèspèt, Amor, Kompartí, Perseverá, Pasenshi, Konfiansa, Yuda, Duna, Komprondé i algun Balor mas. Na Aruba tambe Biblioteka Nashonal a partisipá na e proyekto aki. E plan di futuro ta pa Gobièrnu dekretá “Un Siman di Balor” ofisial.
Pa loke ta trata KBF Tio Ali ta sumamente kontentu i agradesido di por partisipá un bia mas pasobra asina Tio Ali ta haña chèns di selebrá su 20 aña ku e muchanan di Aruba tambe ku a Bendishoné ku hopi Kariño, hopi Amor i hopi Rèspèt. Anto pa kaba di tenta Tio Ali e Tema di e aña aki ta Fiesta. Fiesta ta e evento kaminda Tio Ali a topa mas tantu bia ku e muchanan na Kòrsou i na Boneiru. Na Aruba Tio Ali no a bin toka pa un fiesta di mucha ainda. Pero despues di e KBF aki si Tio Ali lo hasi esfuerso pa esei tuma lugá.
E aña aki dia 17 di augùstes, dia di Lucha pa Libertat na Kòrsou, Tio Ali a risibí un Homenage serka e organisashon Famia Parenchi ku ta un Grupo di Famia ku tin 28 aña ta reuní tur aña. Miembronan konosí di e famia den ramo artístiko ta sr. Rudy Plaate i Izaline Callister. Tio Ali ta kere ku kada un bia ku e risibí un rekonosimentu, ta Dios ta bisé: “Bo ta bai bon Mi yu, sigui asina”. I ta esei ta intenshon di Tio Ali. Semper Bai Dilanti ku Alegria i Positivismo.
Danki na Biblioteka Nashonal i tur e Kolaboradónan ku a lagaTio Ali sinti semper manera un Rei. Danki tambe na tur e koleganan di Aruba ku a risibí Tio Ali ku brasa i kurason habrí. Danki pasobra si Tio Ali a nifiká algu den e 20 añanan ku a pasa ta danki na boso tambe. Dios Bendishoná Aruba.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn