Tio Gabi ta bishita muchanan di scol

Gabriel Mercera ta bini Aruba pa participa na e Festival di buki pa mucha. Su nomber di cariño ta Tio Gabi y pa un siman largo e ta duna presentacion na diferente scol y tambe na biblioteca Playa y San Nicolas. Pues un siman masha druk pa Tio Gabi. E festival di buki ta habri diabierna atardi 6or dilanti biblioteca na Playa cu un fiesta pa tur mucha. Por disfruta di un presentacion special di muchanan di Scol Colegio Sagrado Curason.

Gabriel (Tio Gabi) Mercera ta bini for di nos hermana isla Boneiro y e ta un musico y poeta entre otro. Durante su carera el a toca cu drumband, steelband, beatband, combo, tipico, orkest, duo, trio, quartet y coro. Gabi Mercera ta orguyoso di su idioma materno Papiamento y e ta publica mas tanto den su mes idioma. Un di su specialidadnan ta rima. Gabi Mercera ta gusta haci hende contento pa medio di musica y ta uza esaki pa yega na mucha y hende grandi. E ta toca den su lesnan y ta uza e medio aki specialmente pa yega na mucha cu mester guia.

Na 1992 el a cuminsa cu su drumstudio “DECO” caminda e ta duna les. Na ocasion di 10 aña di existencia di DECO el a introduci un buki na Papiamento pa siña drum. El a dedica e buki na su alumnonan. Su obra di poesia “Réspétpagrandiichiki” a keda publica na 2005 y na 2007 “Masha danki” a mira luz.

Bishita na scol ta tuma lugar den siman di dia 3 pa dia 7 di november. Biblioteca ta clausura e siman cu un presentacion di muchanan di Colegio Laura Wernet-Paskel na Santa Cruz. Esaki ta cuminsa 6or. Tur mucha y nan mayor ta bonbini.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn