Trabao a habri na Cuba

Sr. Jose Miguel S. Donata a haci entrega di su buki “Trabao a habri na Cuba” na Biblioteca Nacional Aruba.

Recientemente sr. Jose Miguel S. Donata a publica su ultimo buki historico titula “Trabao a habri na Cuba”. E publicacion folklorico-historico aki ta relata e historia di e Arubianonan cu a biaha bay Cuba pa traha den un epoca dificil na Aruba unda tabatin scarsedad di trabao. Esaki tabata e prome decadanan di siglo XX. A base di relatonan di descendientenan y di investigacion hasi na Aruba y Cuba sr. Donata ta describi e biahe pa Cuba, e bida y trabao na Cuba y e Arubianonan cu a dicidi di bolbe bek Aruba. Esaki ta e di dos buki di sr. Donata tocante historia di Aruba. E prome publicacion ta titula “Cariñosamente ...Recuerdonan di mi wela y otronan”.

Jose Miguel ta dedica e buki aki na tur e Arubianonan di antes, cu durante un epoca dificil cu nos isla a conoce, mester a riesga nan bida crusando lama den barco di bela pa bay traha na Cuba. Nan ta persona cu a mustra un determinacion y curashi hopi grandi pa tuma un decision di bay traha leu for di Aruba. E buki Jose Miguel ta dedica tambe na e cantidad desconoci di Arubiano cu no a sobrevivi e biahenan of cu nunca mas hende a bolbe tende algo di nan. ....nan ta laga un bashi den e curason di nan sernan keri.

Jose Miguel S. Donata a nace na Aruba ta docente di Spaño y tin un Bachelor of Arts y un Master of Arts den Languages and Cultures of Latin America/Spanish. Su pasion ta e Historia (Oral) y e Folklore di nos isla y e aspectonan tipico Arubiano di nos lenga Papiamento. E relacionnan Internacional di Aruba principalmente cu pais den region di Latino America y Caribe tamba ta otro di su interesnan.

Pa su di dos buki “Trabou a habri na Cuba” Jose Miguel a haci investigacion na Aruba cu sosten di Archivo Nacional Aruba y tambe biahenan pa un periodo na Corsou y Cuba pa cua el a ricibi sosten financiero di Prins Bernhard Cultuurfonds y UNOCA.

Riba potret por wak Sr. Donata y sra. Lilian Semeleer, hefe suplente di Biblioteca Nacional Aruba.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn