Tremendo tayer di autora Evelien van Dort pa boluntarionan di FBNDD

Manera custumber, FBNDD ta haci tur lo posibel pa aporta na promocion di lesamento den nos comunidad. Directiva ta purba ta mas diversifica posibel den esaki.

No tabatin espacio pa duda ora cu autora Evelien van Dort, cu ta participa na Siman di buki di BNA, a ofrece pa duna un tayer tocante e problematica di relaha, pega soño y drumi bon cerca mucha. Sra. Van Dort y su casa Henk tin hopi admiracion pa e trabou cu FBNDD ta haci riba tereno di promocion di lesamento. Na mas di un ocasion nan a acerca e organisacion cu diferente bunita gesto, manera donacion di buki.

Sra Van Dort tin 30 aña di experiencia como fisioterapista na Hulanda, cu specialisacion riba tereno di mucha y hoben. E ser humano di awendia ta biba den un continuo stress door di e cantidad di actividad riba un dia. Mescos ta conta pa mucha y hoben. Continuamente mayornan ta acerca Sra. Van Dort cu e peticion pa ayudo cu e problematica di relaha y pega di soño di nan yiu. E preocupacion di  mayor a inspira Sra. Van Dort pa diseña un tayer practico y efectivo.

Diahuebs 30 di oktober, el a duna un grupo di 10 boluntario di FBNDD un tayer sumamente interactivo y interesante.

Sra. Van Dort ta prefera di traha den grupo chikito pa por duna cada partcipante atencion special. E grupo lo comparti loke a siña despues cu demas boluntario durante e tayernan prome cu bishita na cas.Sra. Van Dort tin pasion den loke e ta haci, e tin un manera hopi trankil y agradabel di mantene atencion di e grupo.
E boluntarionan a participa cu entusiasmo y tabatin hopi elogio pa contenido di e tayer.

Nan a practica diferente ehercicio simpel y efectivo pa relaha. Culminacion tabata masashi cu azeta di kamilosan of lavender na batata di pia, enkel y bou di planta di pia. Tabata bisto con e masashi ta relaha e participante, te casi pon’e pega soño.

Sra. Van Dort a splica cu experiencia di e famianan cu el a asisti cu e terapia aki ta hopi positivo.

Sra. Van Dort a ratifica tambe e mensahe cu FBNDD ta comparti cu mayor for di momento cu a lansa e proyecto; e influencia negativo di uzo excesivo di aparato manera computer, T.V, Ipad, y cellular riba concentracion di e mucha.

El a duna un lista di conseho cu dokter di cas na Hulanda ta duna mayor:

Baha e cantidad di ora dilant’i un pantaya:

  1. menos di 2 ora pa dia pafo di orario di scol
  2. mucha bou di 2 aña preferiblemente nada di pantaya
  3. no pone niun T.V/aparato electronico den camber
  4. stop uzo di pantaya un ora prome cu drumi
  5. papia cu e mucha tocante contenido di loke e ta haci riba internet
  6. como mayor, sea tambe critico riba bo uzo di media.

Na final di e tayer Sra. Van Dort a haci entrega di un pakete di buki na FBNDD.

E conocido trompetista Candy Dulfer, bon amiga di Sr. Henk van Dort, a skirbi un bunita mensahe como aprecio pa e trabou di Evelien van Dort den su buki; ‘Ben ik echt anders dan anderen’. E buki ta trata e tema termento y ta traduci den 4 idioma. FBNDD ta hopi gradicido na Evelien y Henk van Dort pa e bukinan y e oportunidad balioso cu nan a ofrece.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn