Un bishita di bombero na biblioteca

Recientemente empleadonan di Biblioteca Nacional Aruba a haya hopi informacion tocante prevencion di candela for di Sr. Osmar Lake, funcionario na Cuerpo di Bombero. Riba invitacion di gerente di biblioteca Sr. Osmar Lake a duna un presentacion tocante e tema importante aki.

Como cu sr. Osmar Lake ta baha cu pensioen e siman aki, despues di 35 aña di servicio, a dicidi di filma e presentacion di sr. Lake pa asina e keda bon documenta. Empleadonan di biblioteca a haya informacion practico y util con pa preveni cualkier emergencia na biblioteca y con pa evacua publico si tin mester. Sr. Lake a duna splicacion di e pasonan cu mester tuma ora algo sosode, e yamada pa 911, detectornan di huma, e alarma, extintor, instalacion di porta y bentana, uso di exit di emergencia, kico hende ta haci fout ora cu tin panico. Sr. Lake a duna conseho pa diferente situacion peligroso cu por surgi tanto na trabou como na cas. Sr. Lake a haci esaki na un manera interactivo y humoristico, stimulando asina tur hende pa participa na e intercambio di informacion. Sr. Lake a duna conseho na staf y personal di biblioteca pa traha riba un plan di evacuacion pa un emergencia y a conseha gerente pa laga empleadonan practica regularmente. Ora cu e alarma ta zona empleadonan mester reacciona mesora y sigur.

Pa sorpresa di e empleadonan na final di e presentacion mester a ‘simula’ un evacuacion. E sirena di brandweer a pone tur hende core sali pafor. Bomberonan a baha for di truck y a saca e branspuit, cla pa paga candela, asina simulando un reaccion riba un yamada di emergencia. Esaki tabata un bon demonstracion pa mehora e seguridad contra candela na biblioteca.

Den nomber di staf y personal di biblioteca nos kier a gradici Cuerpo di Bombero y Rescate Nacional, sr. Kelly y Lake,  pa e presentacion y na mesun momento desea sr. Lake pabien cu su pensioen y exito den futuro.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn