Un cuadra di Yakanuko pa biblioteca

Nick van Leent, ilustrado y creador di e caracter visual Yakanuko a laga un bunita regalo atras. Durante su estadia na Aruba el a pinta Yakanuko riba un canvas cu acryl. Nick a regala tur e bishitanten hoben di biblioteca e cuadra aki. Nan por pasa wak Yakanuko na biblioteca dia cu nan ta bay entrega of fia otro buki. E cuadra ta colga den espacio publico den e seccion di mucha. Asina Yakanuko por tene un bista riba tur e su fan nan na Aruba.

Yakanuko tin hopi plan pa futuro. Asina Yakanuko ta bay teatro y otro aña e ta bay un gira pa tur parti di Hulanda. Sigur sigur e muchanan di Aruba lo tende mas di Yakanuko. Yakanuko tin hopi mas aventura planea. Yakanuko tin su mes pagina riba Facebook pa asina tur su admiradornan por sigui tur su pasonan.

Nick, di tempo cu el a cuminsa pinta a keda inspira pa e estilo Hapones di pinta. Su cashi ta yen di e bukinan di studio Ghibli, e peliculanan di Hayao Miyazaki y Manga. Tambe e tin un coleccion di buki di arte di computer games di Nintendo y buki di Disney y Pixar. E ta siña hopi di e bukinan aki. E ta keda descubri diferente tecnica y estilo y esceno. E kier a crea mundonan nobo pero pa hopi tempo e no tabata sa kico pa haci cu tur su pinturanan. Y e no tabatin un storia. Un dia el a topa Curt Fortin, autor y contador di storia y nan a dicidi di combina nan talentonan y traha hunto. Ya pa mas cu 5 aña nan ta crea hunto, soña hunto, spaar placa pa desaroya tecnicanan nobo y asina hunto nan a descubri un mundo nobo. Y for di e energia aki Yakanuko a nace como imahen pero tambe como produccion cu diferente producto manera un buki, un animacion y un show di teatro. Ainda tin mas na caminda. Y nan lo sigui comparti nan storia cu tur mucha.

Nick van Leent a nace na Den Haag na 1985 y e ta specialisa den computers y ilustracionnan grafico. E tin un educacion den Graphic design y ta desaroya su propio fonts y logo’s. Nick a bishita diferente scol na Aruba hunto cu Curt Fortin den cuadro di e Festival di Buki pa Mucha 2015 di Biblioteca Nacional Aruba. 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn